Бұған дейін бұл сайыс Алматы облысының Нарынқол өңірінде өтіп келсе, бұл жолы Жетісу облысының жеке шаңырақ көтеру құрметіне орай тұңғыш рет ұйымдастырылып отыр. Бұл реткі құсбегілердің ХІV чемпионатына Алматы, Түркістан, Абай, Атырау, Маңғыстау, Шығыс Қазақстан облыстары және Астана, Алматы қалаларының спортшылары қатысты.
Жарыстың ашылу салтанатында сөз салған Жетісу облыстық дене-шынықтыру және спорт басқармасының басшысы Алмат Үшкемпіров, халқымыздың байырғы өнері салбурын – саятты дамыту қай жағынан болсын қажет екеніне тоқталып, жарысқа қатысушыларға сәттілік тіледі. Осылай екі күнге созылған жарыс қорытындысы бойынша, атыраулық құсбегі Иманғали Абдыкәрімұлы чемпион атанса, қаршыға салуда Алматы облысының өкілі Сейітжан Бексұлтан үздік деп танылды. Ал ителгі баптаудан Түркістан облысының өкілі Мүсәлім Салманға тең келер ешкім болмады. Осылай Түркістан облысының құсбегілері 1 алтын, 1 күміс, 2 қола медальға ие болса, Атырау және Алматы облысының өкілдері бір-бірден алтын медалды жеңіп алды.
Алуа ОСПАНЖАН,
Жетісу облысы дене шынықтыру және спорт басқармасының баспасөз хатшысы