Көрмені өткізудегі мақсат – бүгінгі еліміздің әкімшілік-аумақтық бірліктерін құрайтын аумақтар бейнеленген бірегей, ерекше құнды карталарды мәдени-ақпараттық айналымға енгізу.
Мәдени іс-шараның ашылуында сөз алған Ұлттық музей директорының міндетін атқарушы Айбек Сыдықов көрменің маңызына тоқтала келіп:
«Картография – бірнеше саланы қамтитын күрделі ғылым. Онда тарих, география, бейнелеу өнері, әдебиет пен мәдениет секілді салалар бір арнада тоғысады. Сондықтан картографияның кеңінен насихатталуы халқымыздың тарихи санасының жаңғыруына ықпал етеді», деді ол.
Сондай-ақ Парламент Мәжілісінің депутаты, тарих ғылымдарының докторы, профессор Еркін Әбіл тарихи география мен архив ісін терең зерттеу мемлекет тұтастығының бір кепілі екенін айтты.
Көрме бес бөлімнен тұрады. «Атластар дәуірі» атты бірінші бөлімде XVI-XVII ғасырларда жасалған 7 карта қойылған. Авторлары – ағылшын, итальян, нидерланд және неміс картографтары. Екінші бөлім – «Жаңа заман картографиясындағы Қазақ даласы». Онда шетелдік ғалымдар құрастырған 5 карта бар. Мәселен, Джон Керри Ресей империясының картасын жасағанда қазақтардың 1799 жылғы этностық аумағын да таныстырады. Үшінші бөлім – «Еуропалық картографияның шарықтау кезеңіндегі Қазақ даласы» деп аталған. Мұнда 4 карта бар, ішіндегі ең құндысы – Джон Мартин Рапкиннің «Тәуелсіз Тартария» картасы. Бұл карта шамамен 1846-1851 жылдары басылса керек. «XIX ғасырдағы Әскери топографтар жұмысындағы Қазақ даласы» деген төртінші бөлімде 8 карта ұсынылған. Оларды Ресей империясы Бас штабының Қазақ даласын зерттеген офицерлері дайындаған. Ал бесінші бөлімде «Қазақ КСР. 1939 ж» тарихи картасы берілген. Бұл картадан Екінші дүниежүзілік соғыс алдындағы Қазақ КСР-інің әкімшілік құрылымын көресіз.
