Содан бері байқаудың ұйымдастырушылары хореографиялық оқу орындары арасында кең тәжірибе алмасуды жүзеге асырып, классикалық би өнері бағытындағы жас дарындардың есімін анықтап, классикалық, халық және заманауи бидің ең озық дәстүрін дамытып, орындау шеберлігін арттыруды басты міндет етіп белгіледі. Сондай-ақ елдің хореографиялық өнері мен білім беру ісінің бәсекеге қабілеттілігін арттырып, имиджін қалыптастыру үшін де бұл байқаудың мәні зор. 2018 жылы бұл байқау ЮНЕСКО-ның қамқорлығына алынған аты аңызға айналған әйгілі Юрий Григорович жетекшілік ететін Халықаралық балет байқаулары федерациясының мүшесі мәртебесін иеленді. Дәстүрлі түрде өтіп келе жатқан халықаралық байқау 150-ден аса қатысушының басын қосып, географиялық ауқымын жыл сайын кеңейтіп келеді. Биылғы байқауда Қырғызстан, Өзбекстан, Ресей, Оңтүстік Корея елдерінің үміткерлері бақ сынады.
«Өрлеу» байқауы хореографиялық білім беру саласында дидактикалық-әдістемелік міндет арқалайды. Биылғы VIII маусым Қазақстанның халық әртісі, көрнекті балет бишісі Сара Көшербаеваның 90 жылдық мерейтойына арналып отыр. Бұған қоса, «Селезнев оқулары» халықаралық ғылыми-зерттеу конференциясы «Қазақ хореографиялық өнері мен білім беру ісінің көрнекті қайраткерлері» және «Ұлттық хореографиялық өнер және білім беру ісінің өзекті мәселелері» атты тақырыбына арналып, балет өнерінің майталман мамандары Дәурен Әбіров пен Болат Аюханов секілді ұлттық балет өнері бірегей тұлғаларының шығармашылығын жан-жақты талдап, еңбегіне баға берді. «Қазақ, қырғыз және өзбек билерінің үлгісіндегі түркі халықтары халық билерінің ұқсастығы мен ерекшелігі» атты тақырыппен конференцияның көрнекілік бөлімі Алматы, Бішкек және Ташкент хореографиялық училищелерінің педагог мамандарының қатысуымен өтті. Байқау аясында Қазақстан және шетел хореографиялық өнерінің жетекші мамандары шеберлік сабақтарын ұйымдастырды. Францияның «Ruée des Arts» би ұжымының заманауи хореография бойынша көрсеткен шеберлік сабағын осы сала саңлақтары жоғары бағалады.
Байқау тарихында бірінші рет соңғы тур, сондай-ақ ауқымды гала-концерт Almaty Theatre-дың сахнасында өтіп, оған алматылық көрермендер мен қала қонақтары қатысты. «Классикалық би», «Халық биі», «Заманауи би» аталымы бойынша үлкен, орта, кіші топ лауреаттары анықталып, «Сара Көшербаева атындағы үздік орындаушы», «Дәурен Әбіров атындағы үздік орындаушы» жүлдесі және «Болат Аюханов атындағы арнайы жүлде», «Жеңіске деген жігері үшін», «Көрермендер көзайымы», Адам мен Гүлнара Қапановтардың арнайы жүлдесі айрықша талантымен топ жарған жас дарындарға табысталды.
АЛМАТЫ
