Коллажды жасаған Қонысбай ШЕЖІМБАЙ, «EQ»
Жасынан талапшыл, қоғамдық мәселелерге бейжай қарай алмайтын Бақытжан Тобаяқ кіндік қаны тамған Кербұлақ ауданының Құрметті азаматы екенін білеміз. «Мен екі өңірді тел еміп өскен азаматпын» дейтіні бар оның. Жетісу жағында туып, Алматыда оқып есейгенімен, түбі Қарқаралы топырағынан. «Бақытжанның бабасы баяғы Құнанбайды көрген Жанақ ақын – заманында белгілі болған адам. Оның Абайдың әкесі Құнанбаймен тұстас, поляктің жиһанкезі – Янушкевичпен кездескені тарихтан белгілі» деген деректі ертеде оқығанбыз. Кештің «Арқа мен Жетісу айбозы» аталу себебі сондықтан болса керек.
Бақытжан Тобаяқ мамандығы бойынша инженер болғанымен, халыққа ақындығы мен журналистігі жақын. Қ.Сәтбаев, Ә.Марғұлан, Е.Бөкетов, Ш.Шөкин, Ш.Есенов, А.Машани туралы жазбаларын көзіқарақты ел біледі. Ақындығы өз алдына бір төбе. Ол жарты ғасыр жұртымен бірге соққан жүрек бары мен нәрін халқының игілігіне айналдыру жолында аз еңбектенбеген. Кеш тізгінін ұстаған Жұмамұрат Шәмшінің айтуынша, 1953 жылы туған қаламгер осы уақытқа дейін 53 кітап шығарыпты. Мектепті алтын медальмен бітіргенін, басқа да марапаттарын айтпағанда. Қазақ баспасөзінде жүріп руханият пен мәдениетке сіңірген еңбегі бәрінен асып кететіндей көрінеді.
Ақынның тойы, мерейлі жасына орай жүрекжарды лебіздер айтылып, жан-жақтан құттықтаулар мен жылы лепестер жетіп жатты. Біреулердің өзі жетіп, біреулердің құттықтау сөзі жетіп, кеш иесінің мерейін асырып-ақ тастады. Астана қаласы әкімінің, Жетісу облысы әкімінің құттықтау хаттары, Қазақстан Жазушылар одағының жылы лепесі, тағы басқа мәртебелі орындардың алғысы мен құрметі бірінен соң бірі оқылып жатты. Солардың арасындағы атаулы құрметтің бірі – «Қазақстанның құрметті журналисі» төсбелгісін Қазақстан Журналистер одағы Астана филиалының төрағасы Шархан Қазығұл табыстады. Елорда билер кеңесі қоғамдық бірлестігінің төрағасы Әнуарбек Ералы да құрмет көрсетіп, құттықтау хаты мен жөн-жоралғы жасады.
Бұрнағы күндері бұл кісі туралы ақын Серік Тұрғынбекұлының материалын оқығанбыз. Інісі туралы аз толғанбапты ақын. Осы жолы кешіне жиналған жазушылар Қуаныш Жиенбай, Жәди Шәкенұлы, Сәдібек Түгел, экономика ғылымдарының докторы, профессор Сайлау Батыршаұлы бастаған тұлғалар да ақынның бағасын асырды. Сәдібек Түгел «Ұлы дала қырандары» республикалық қоғамдық мәдени-әлеуметтік бірлестік атынан «Ерекше тұлға» медалін кеш иесінің өңіріне тақты. Қаламгердің айтуынша, «Бақытжан Тобаяқтың ақындығы мен қаламгерлігі өз алдына, қоғамдық жұмыстарда да белсенді. Кез келген жағдайға бейжай қарай алмайды. «Арайна, халқым, арайна» деп ұран көтере білген азамат».
Қазақстан Жазушылар одағының мүшесі Жәди Шәкенұлы замандасының шығармашылық тұлғасын жоғары бағалады.
Бақытжан Ошақбайұлы ағамыз қазақ әдебиетінде өзіндік қолтаңба қалыптастырып, өз орнын алған қаламгер. Келешек ұрпаққа әлі де болса берері мол. Осы күнге дейін жемісті қызмет атқарып келе жатқаны соның белгісі. Жазған өлеңдері, әнге айналған сөздері болашақ ұрпақ рухына қызмет етеді деп сенеміз. Әдеби кешке қатысқан оқырмандар мен тұрғыластарының белсенділігі біздің бұл ойымызды қуаттай түседі. «Баталы құл арымас» дегендей, елдің алғысы мен құрметін иеленуімен-ақ, ел үмітінің арқасында қазақ қаламгері ретінде есімі алтын әріптермен жазыла бермекші», деді ол.
«Сұлулыққа шомылған өлеңдерім – Таң бояуын, Күн нұрын сіміреді» деген ақын жүрегінің сәулелі бояуы оқырманын жақсылыққа бастайды деп сенеміз.
