Музей-қорық директоры, тарих ғылымдарының докторы Әбілсейіт Мұхтардың айтуынша, жақында сапар орталығын ашу жоспарланған. Оның құрамында экспозициялық көрме залдары, қор қоймасы, конференц-зал, зертханалық және реставрациялық бөлмелер, электронды деректер базасы жасақталған кітапхана бар. Орталықта дәріс өткізуге арналған алаңдар, ашық аспан астындағы музей және этноауыл да орналасқан.
– Қазақ даласындағы ең көне тарихи орындардың бірі, ірі сауда қаласы Сарайшық 1580 жылы қираған. Бұдан 300 жыл бұрын бұл Ұлы Жібек жолы орталықтарының бірі болған еді. Сол себептер, Сарайшықтың тарихы тым тереңде жатыр. Өйткені бұл – Ұлы Жібек жолы бойындағы ортағасырлық қала. Сапар орталығында моңғолға дейінгі, моңғол кезеңі, сондай-ақ Ноғай ордасы мен Қазақ хандығы тарихына қатысты құнды дүниелер жұртшылық назарына ұсынылады. Оның ішінде Сарайшық қалашығының материалдық мұралары, дәл осы жерден әр кезеңде табылған жәдігерлер, Алтын Орда туы немесе бүгінде кейбір елдердің мемлекеттік елтаңбаларында көрініс тапқан қос басты бүркіт белгісі қойылады. Бұрын бұл белгі Сарайшықтан табылған еді. Қасым хан мен Бату ханның бейнелері алғаш рет осында көрсетіледі. Бұл тұлғалардың бейнелерін жасау үшін ғалымдармен бірлескен жұмыс атқарылды, – дейді Әбілсейіт Мұхтар.
Сапар орталығында тарихи қалашықтың ғылыми негізде қайта жасалған бірегей макетін ұсыну көзделіп отыр. Алтын Орда кезеңіндегі Сарайшықтың макетін жасауға ғалымдар көмектескен. Барлық экспозицияның мультимедиялық нұсқасы дайындалған. Бұл сапар орталығына келетін қонақтардың қазақ, орыс және ағылшын тілдерінде ақпарат алуға жол ашады.
– Қазақстанда еліміздің өткенінен сыр шертетін киелі де тарихи орындар көп. Сондай орындарға азаматтарымыз ғана емес, шетелдік туристер де үлкен қызығушылық танытады. Алайда тарихи және археологиялық ескерткіштер орналасқан аумақта туристік инфрақұрылым жоқтығы туризмді дамытуға қолбайлау болып отыр. Ал көне Сарайшық аумағында ашылатын сапар орталығы еліміздің бай мәдени және тарихи мұрасына назар аудартып, туризмді жандандыруға септігін тигізеді, – деді Алтай Көлгінов.
Атырау облысы
