БҰҰ бағдарламасы Маңғыстауда жүзеге асады

Мұнайлы Маңғыстаудың дамуынан тыс, аймақта экология, халық денсаулығы, күн мен жел энергиясын пайдалану, бизнесті өркендету секілді бағыттарда бұдан да қарқынды жұмыс жүргізуге, жетіспей тұрған тұстарды аз уақыт ішінде қалыпқа келтіруге болады. Біріккен Ұлттар Ұйымынан келген делегация осылай деп, бірлесе жұмыс жасау үшін өз бағдарламаларын ұсынды. БҰҰ-ның бұл ұсынысын қабыл алған Маңғыстау облыстық әкімдігі өзара бірлескен жаңа бағдарламаны ашу мақсатында екіжақты келісімге қол қойды. Бірлескен бағдарлама БҰҰ-ның UNDP – Біріккен Ұлттар Ұйымының Даму бағдарламасы, UNESCO – Білім, ғылым және мәдениет мәселелері жөніндегі біріккен ұлттар ұйымы, UNFPA – БҰҰ Халық саласындағы қоры, UNHCR – БҰҰ Босқындар ісі жөніндегі жоғарғы комиссарының басқармасы, UNICEF – Біріккен Ұлттар Ұйымының Балалар қоры, UN Women – БҰҰ Гендерлік теңдік және әйелдердің құқығы мен мүмкіндіктерін кеңейту мәселелері жөніндегі құрылымы және WHO –Дүниежүзілік денсаулық сақтау ұйымы сынды жеті агенттіктің білікті мамандары кеңесімен жүзеге асады. – Маңғыстау облысы қарқынды даму үстіндегі және тарихи көне ес­керт­кіштерге толы өлке. Осы ес­керт­кіштерді әлемдік деңгейде БҰҰ-ның мұрасына енгізуге болады. Облыс әкімдігімен бірлесе жүзе­ге асы­ратын бағдарламамыздың ма­қ­саты – жарқын болашақты бірлесе жа­сау. Бағдарламада жасыл экономика­ны дамыту, тұрғындар денсаулығын жақ­сарту, кәсіпкерлікті өркендету, – деп таныстырды бағдарлама барысын БҰҰ тұрақты үйлестірушісі Стивен Тулл. Ауылдық жерлерде жаңа кәсіпкер­лікті дамытуды жүзеге асырып, кіші гранттармен қамтамасыз ететін  тетіктерді құруға Қазақстан Респуб­ли­касы Үкіметімен бірге әрекет ететін олар балалар денсаулығы, жынысты және репродуктивтi денсаулық, жұқ­палы емес аурулардың алдын алу және емдеу, өзіне өзі қол жұмсау, тұрмыстағы зорлық-зомбылықты болдырмау бағ­дар­ламаларынан құралған БҰҰ-ның ең үздiк деген халықаралық стандарттар мен практикаларды әкелеміз деп отыр. Сондай-ақ, ауыл шаруашылығы, су мен энергияны үнемдеу, табиғи апатты азайту және төтенше жағдайларға дайындалу тәжірибелері де назардан тыс қалмақ емес. Бастаған шаруаларының сәтті жүзеге асуы үшін отандық сарапшыларды және халықаралық мамандарды бағдарламаға қатыстырып, семинар-тренингтер ұйымдастыру жоспарланған. Қазіргі таңда еліміздің Қызылорда, Шығыс Қазақстан облыстарында жүзеге асырыла бастаған бағдарлама үш жылдан соң өз нәтижесін бере бастайды екен. Бағдарламаны ұсынушылар Маңғыстау облысында аймақтың әлеуметтік-экономикалық, экологиялық саласын дамытуды көздейді, сондай-ақ, денсаулық саласы және жастар мәселесімен айналыспақ. Бұл саладағы кемшін тұстарға көз жеткізу үшін Маңғыстау облыстық денсаулық сақтау басқар­масымен қоян-қолтық жұмыс жүргізу­ді қалайды. Саламатты өмір туралы ақпараттарды, медициналық қыз­мет көрсетуді аналар мен жастарға қолжетімді етуді өз жұмыстарының басым бағыттары санайды. – Жасыратыны жоқ, Қазақстанда аналар өлімі жиі орын алады. Бұл көкей­кесті мәселеге үнемі инфра­құ­ры­лымның немесе жоғары меди­циналық жабдықтардың жетіспеушілігі себеп бола бермейді, кей жағдайларда дәрі­герлердің науқасқа деген қарым-қатынасынан да мәселе туындап жатады. Емделушінің оңалуына дәрігердің күтімі, өзіне деген қарым-қатынасы үлкен психологиялық әсер ететіндігі анықталған. Біз осы мәселеге назар аудара отырып, Маңғыстау медицинасына Швейцарияның медициналық жүйесін енгізуді ойлаймыз, – дейді UNFPA-БҰҰ Халық саласындағы қорының директоры Н.Ботев денсау­лық сақтау саласы бойынша жасалатын жұмыстар жөнінде. Маңғыстауда БҰҰ бағдарламасын ұсынушы делегация Маңғыстау облы­сының әкімі А.Айдарбаевпен кездесіп, екіжақты келісімге қол қойды. Гүлайым ШЫНТЕМІРҚЫЗЫ, «Егемен Қазақстан». АҚТАУ. Суретті түсірген Серік МАЙЕМЕРОВ.