Өткен ғасырдың 1968 жылы құрылып, тек Қазақстанда ғана емес, жаһанның өзге мемлекеттерінде атағы асқан «Гүлдер» ансамблі аңызға айналғалы қашан. Гаванада өткен ІІ Дүниежүзілік студент жастар фестивалінен кейін мәртебесі биіктеп, халықаралық деңгейдегі жүлделерге ие болған ансамбль тарихта өшпес орнын қалдырған болатын.
Қазақстанның белгілі әртістері Сара Тыныштығұлова, Роза Рымбаева, Қапаш Құлышева, Қайрат Байбосынов, Айжан Нұрмағамбетова, Мақпал Жүнісова, Нағима Есқалиева, Майра Нұркенова, Жеңіс Ысқақова, Бақыт Шадаева, Бақтияр Тайлақбаев, Сембек Жұмағалиев, Гүлнәр Сиқымбаева, Қанат және Айткүл Құдайбергенов сынды өнер майталмандары шығармашылығын «Гүлдерде» бастады. Алғашқы жетекшісі Қазақстанның халық әртісі Гүлжихан Ғалиева.
Таяуда «Гүлдер» ансамблінің жаңа құрамы Алматы көрермендері үшін Республика сарайында арнайы концерттік бағдарлама көрсетті.
Көрермен ықыласы ерекше болып, залда ине шаншар бос орын қалмады. Кеш барысында ансамбльдің тарихы мен өнер майталмандары туралы бейнеролик көрсетіліп, «Гүлдердің» өнердегі бағындырған биік белестері таныстырылды. Көпшілікке «Гүлдер» ансамблінің шығармашылық мұрасынан ең үздік қойылымдары мен түрлі жанрдағы жаңа музыкалық-хореографиялық композициялары ұмытылмас әсер сыйлады.
Еске сала кетейік, былтыр тамыз айында Роза Бағланова атындағы «Қазақконцерт» мемлекеттік концерттік ұйымы аты әлемге жайылған шығармашылық ұжымды жаңғырту жобасын қолға алған. Ұжымға шығармашылық оқу орындарының түлектері алынып, тәжірибелі тәлімгерлер – бас балетмейстер ретінде Анвара Садықова және жобаның көркемдік жетекшісі әрі дирижері Серік Дәулетов шақырылған-тын.
Айта кетейік, 1 наурыз күні Астана қаласында ансамбльдің жаңа құрамының тұсаукесер концерті болып өтті. Кешке қазақ эстрадасының жұлдыздары, «Гүлдер» ансамблінің алғашқы солистерінің бірі, Қазақстанның халық әртісі Роза Рымбаева, Мақпал Жүнісова, жас әншілер Мәди Сыздықов, Зарина Божакова, Дидар Әбдіхалық және Салтанат Меңдіғалиева, «TURAN» фольклорлы-этнографиялық ансамблі мен «Steppe Sons» альтернатив-фольклорлық тобы қатысты.
