Ақшаңқан «Астана Операда» мемлекеттік деңгейдегі концертті көрген де, көрмеген де арманда шығар. Залдағы иін тірескен көрермен-тыңдарманды көріп-біліп жүрміз ғой, ал мұнда ат шаптырым дерлік сахнаны толтырып сіресіп тұрған өнерпаздар қатарынан көз тұнып-ақ кетті. Қазақ даласының әр өңірінен келген 24 шығармашылық ұжым өкілдері, аспаптағысы бар, хордағысы және басқасы, барлығы 1000-нан астам музыканттың өнері сірескен залдың сеңін лықсытқандай әсерге бөледі. Сіз ойлаңыз, 1000 жүректің лүпілі не әрекетінен сөгіліп ұшқан әуен сиқыры құлақтан кіріп, бойды алмаса, онда, анығын айтқанда, өздері білсін! Күйші Дина алғаш ресми сахнаға көтерілгенде Жұмекен ақынның «жетпіс алты дәурен-ай, жетпіс алты жыл өткен, жетпіс алты қасірет – жетпіс алты жүрекпен» деп толғайтыны бар. Мұнда бір мезетте мың жүрек толғап ала жөнелгенде... Халық әндерінде шырқалғандай «жүрегің тас та болса бір ериді». Осыншама адам орындаған музыкалық туынды да ұзақ екен. Айтарлықтай әсері болмаса, сөз басында айтқанымыздай ел арқаланып кетпес-ті арасында. Басында ептеп скрипка, саксафонның үнімен ілгерілей бергенде, әрине біз әуелі домбыраның күмбірін ести алмай жатырқап қалғанбыз. Құрама оркестр құрамында да домбырашылар көрінбеген. Алдында жалғыз-ақ домбырашы отырды. Сыбызғы, сазсырнай, шаңқобыз да бір-бірден. Қазақтың қылқобызы болды ма, жоқ па, білмейміз. Соған қарамастан, концерт бойы халықты үйіріп алып отырған бір-біреуден болса да ұлттық аспаптар үні, әсіресе домбыра. Бір жарым сағатқа созылған музыкалық туындының басым бөлігі шетелдік аспаптарда орындалғанымен, тыңдарманды сілкіндірген тұстары ұлттық аспап үні екені айқын білінді.
Мерекелік іс-шара мәдениет және өнер қызметкерлері мен қайраткерлеріне Мемлекет басшысы Қасым-Жомарт Тоқаевтың жолдаған құттықтау хатын Мәдениет және спорт министрі Асхат Ораловтың оқып беруімен ашылды. Президент жаһандану дәуірінде қазақ мәдениетін сақтау өте маңызды екенін, оның дамуына үлес қосу біздің ортақ міндетке жататынын айтқан. Сондай-ақ барлық мәдениет және өнер қайраткерлеріне алғыс жолдап, олардың еңбектері өскелең ұрпақтың рухани баюына, сол арқылы дамуға көмектесетінін атап өтіпті.
«Ұлы дала әуені» одасына Құрманғазының, Тілеп, Абай, Шәкәрім, Нұрғиса шығармаларымен қатар, «Дудар-ай» әні енген. Әуелі жаймашуақ, сыздықтата басталғанымен, біраздан соң Абай әндерінің терең толғақты үнімен ширықтырып барып, әрі қарай Құрманғазы күйлеріне ұласқанда шарықтаған әуен тәнті етеді. Бұл халықтың ықыласынан да айқын байқалып отырды. Бір сағаттан астам уақытқа жалғасқан туынды бойына ұлттық және классикалық музыканы үйлестірген. Ұлт өнеріндегі шоқтықты музыкалық шығармаларды жаңаша әсірелеп ұсына білген шығармашылық топтың еңбегін атап өткен жөн. Хор ұжымдары, оркестрлер, виртуоз аспапшылар, опера және халық әншілері, скрипкашы, дирижер (Абзал Мұхитдин), тағы басқалардан құралған 1000 адамды осылай бір туындыға жұмылдыру да ерен еңбек.
Мәдениет пен өнер – елдің жаны мен арын әйгілеп қана қоймай, ұлттың атын шығаратын да сала. Майталман және жас өнерпаздар бірлесіп, өнерсүйер қауымға қазақ күйі һәм ән-әуендері мен классикалық музыканың ғажайып үйлесімін тарту ете алды. Бұл шығарма қазақтың классикалық туындыларын заманауи интерпретациямен тартымды және ауқымды форматта орындағанымен есте қалса керек.
Мәдениет және өнер қызметкерлері күні қарсаңында бір апта бойы бүкіл елімізде концерттер, көрмелер, дөңгелек үстелдер және басқаларын қосқанда барлығы 100-ден астам іс-шара өтіпті. 300 мәдениет қызметкері «Мәдениет саласының үздігі» төсбелгісімен, 2000-ы Құрмет грамотасымен және Алғысхатпен марапатталған. Ал мына концерт осы үлкенді-кішілі мерекелік дүниелердің барлығының қорытындысындай болды.
Концерттік бағдарлама аяқталғаннан кейін А.Оралов сахнада өнер көрсеткен әртістер мен шығармашылық ұжымдардың жетекшілеріне Алғысхат табыстады.
«Мәдениет және өнер қызметкерлері күніне арналған іс-шаралар апталығын лайықты түрде аяқтадық деп ойлаймын. Біздің бастамамызды қолдағандардың барлығына және Мемлекеттік опера және балет театрының сахнасында өнер көрсетуге шақыруды қабылдаған шығармашылық ұжымдарға рахмет айтқым келеді. Осы жобаға қолдау білдіріп, қатысқаны үшін Марат Бейсенғалиевке ерекше алғыс. Министрлігіміз мәдениет пен өнер саласын дамыту және қолдау бағытындағы жұмысты жалғастырады. Алдағы уақытта белгіленген нақты тапсырмаларды сіздермен бірге орындай алатынымызға күмәнім жоқ», деді Мәдениет және спорт министрі А.Оралов.
