Тоты Сматова 2021 жылдың желтоқсанында «CheckDoc» стартапын жүзеге асырды. Цифрлық зертхана үйде диагностика жүргізуге мүмкіндік береді. Жедел медициналық сервис әрбір клиентті сапалы тексеруден өткізіп, ауруды ерте кезеңде анықтайды. Жас ұжым емді сапалы әрі қолжетімді еткісі келген. Медбикелер тұтынушылардың үйіне барып, анализдерге биоматериал жинайды немесе ПТР тестін жасайды. Содан кейін оны зертханаға апарады, онда зерттеулер жүргізіледі. Нәтижелер сайттағы қолданушының жеке профиліне жіберіледі.
«Astana Hub» халықаралық технопаркінің қатысушысы – CheckDoc стартапына «Almak Capital» Дубай қоры инвестиция құйған. Қаржыландыру қызметі технологиялық бөлікті дамытуды және нарықтағы өсуді жеделдетеді.
«Біздің дәстүрлі зертханалардан айырмашылығымыз бен артықшылығымыз – технологиялық ДНҚ, тапсырыс және келу үдерісін өңдеу жылдамдығында. Тапсырыс берген сәттен бастап оны жүзеге асыруға дейін 40-60 минут өтеді. Біз медициналық диагностиканың Airbnb-і сияқтымыз. Біздің күшіміз – клиентке не қажет екенін білеміз және қалай байланысу керектігін түсінеміз», дейді Т.Сматова.
Отандық диагностика қызметінің қазіргі мақсаты – диагностикаға басымдық беретін №1 медициналық қызметке айналу. Осы кезеңде олар жасанды интеллект көмегімен жобаның IT құрамдас бөлігін күшейтуге жұмыс істеп жатыр. Алдағы уақытта жергiлiктi диагностика нарығының 15 пайызын қамтуды жоспарлап отыр. Т.Сматова ұлт денсаулығына өз үлесін қосып, халықтың халін жақсартып, тұрмысын түзегісі келеді. Ол инвесторлар жобамызға қолдау білдірсе, шетелдерге де жол ашылар еді дейді.
«Жаһандық цифрлық денсаулық сақтау нарығы жыл сайын өсіп келеді. Тек кейінгі үш жылда бұл екі есеге жуық өсті. Айталық, 2020 жылғы 216 млрд доллардан 2023 жылы 417 млрд долларға дейін ұлғайды. Біз цифрлық денсаулық сақтау жобаларының болашақта табысы артады деп ойлаймыз. CheckDoc – тұрақты қаржылық моделі бар стартап. Компания тек оң динамика көрсетіп келеді. Сондықтан біз компанияның жаңа нарықтарға шығуына мүмкіндік беріп, стартаптың технологиялық жағын жетілдіру үшін инвестиция құйдық», дейді Almak Capital басқарушы серіктесі Олжас Өкенов.
Осыдан біраз жыл бұрын кәсіпкер Т.Сматованың енесі қатерлі ісікке шалдығады. Бұл дерттен арылу үшін отбасы Испанияға көшіп, сол жақта операция жасатады. Операциядан кейін апта сайын емханаға бару қажет болғандықтан, қалыпқа келуге ұзақ уақыт кеткен. Өзі аурудан жаны қиналып тұрған адамды жол әбден титықтатып тастайтыны рас. Бұл науқасқа өте үлкен күйзеліс әкеледі. Сонда Тоты неге медициналық қызметкерлер өздері пациенттердің үйіне бармайды деп ойлана бастайды. Осы идеямен елге оралып, Астанада СheckDoc көшпелі диагностика сервисін құрады.
Жобаның алғашқы қадамдары 2021 жылдың жазында жасала бастайды. Ол дәрігерлермен сөйлесіп, жүйенің мән-жайын зерттейді. Мамандар медицинаның 70 пайызы диагностикадан тұратынын айтқанда, биоматериалдарды жинауға сұраныс әрқашан болатынын түсінген. Жобаны жүзеге асыруға білікті қызметкер табу да қиынға соқпапты. Себебі жобаның жаңашылдығы мен жанашырлығы жақсы мамандарды өзі-ақ тартқан.
«Алғашында медбикелерді жалдауда ешқандай мәселе болған жоқ. Біз жобаны енді ғана бастағанымызға қарамастан, адамдар бізбен жұмыс істеуге келісті. Мүмкін олар қарапайым зертханалардан жалыққан шығар. Елестетіп көріңізші, күнде бір бөлмеде отырып, сарғайып күтумен уақыт өтеді. Ал бізде динамика бар. Орындардың үнемі ауысуы және ыңғайлы жағдайдағы адамдармен қарым-қатынас жақсы көңіл күй сыйлайды», дейді Тоты.
CheckDoc басты назарды қызметтің сапалы, жайлы болуына аударған. Бұл жердегі негізгі мақсат – биоматериалды жинауды күйзеліссіз жүзеге асыру. Ол үшін адамдарға гематогендер, дәрумендер беріп, мейлінше сыпайы сөйлесуге тырысады. Бұл қарапайым нәрсе сияқты көрінуі мүмкін. Бірақ классикалық ауруханалардан көре алмайтын, жетіспейтін дүние.
«Жобамыздың жүзеге асуы жақсы болды, бірақ мінсіз деп айта алмаймын. Мысалы, бірнеше айдан кейін медбикелер жұмыстан кетіп қалып жатты. Бұл жобаға ауыр соғады. Сонда ғана олардың мәселелеріне көбірек көңіл бөлуім керек екенін ұғына бастадым. Бұл сала біздің әлеуетті бәсекелестерімізден серіктестер жасайды. Біз классикалық клиникалардың нанын тартып алмаймыз. Керісінше, оларға өз қуатын барынша арттыруға және көбірек ақша табуға көмектесеміз. Сондықтан қазір медициналық компанияларға бірлесіп жұмыс істеуді ұсынамыз», дейді сервис басшысы.
Жаңашыл жоба медицинадағы бірқатар мәселені шешеді. Сырқат шаршатқан қаншама науқас кезек күтіп отыратыны өтірік емес. Цифрлық технологияны жүйесіздікті жоюға пайдаланғанымыз құба-құп.
