Өнер • 26 Желтоқсан, 2023

Классикалық музыка кеші

149 рет
көрсетілді
4 мин
оқу үшін

Кейде әуенмен-ақ жүректің кілтін табуға болады. Сөзсіз, эмоциясыз, тіпті мимикасыз-ақ нотаға түскен саз көңіл көгершінін еркін самға­та­ды. Әртүрлі аспаптың толқынынан туған тамаша туындылар – көрер­мен­нің жан азығы. Осы аяулы әсерді Талдықорғанда өткен классика­лық музыка кешінен алдық. Адамның жан әлеміне еркін бойлаған көр­кем шығармалар шынайы өнердің құдіретін сезіндірді.

Классикалық музыка кеші

Суретті түсірген – Жеңіс Ысқабай

«Қазақтың ән әуездерінің тамаша бір қасиеті — оның шын жүректен шыққан эмоциялық сезімталдығы мен сезгіштігі». Өнертанушы Борис Астафьевтің осы бір оймақтай ойы­на иланбасқа болмас. Тағдыр ар­қалап жүрген әрбір адамның өнер­ден алар өзіндік сезімі болады десек, жалпы адамзаттық іңкәрліктің нәзік пернесін бебеулетіп жіберетін құдіретті өнердің бір парасына музыканы жатқызамыз. Ал осынау саз әлеміндегі биіктікті өркениет өрінен табылған елдер классикалық музыка деп білетіні даусыз.

Күлдір-күлдір кісінер тұлпар­мен жанын үндес деп білетін, өзін жыл­қытекті халықпын деп санайтын қазақтың классикалық музыка өнерден алған үлесі жоқ емес. Кешегі ғасырдың алыбы саналған М.Төлебаев бастаған композиторлар классикалық музыка тұғырына ту ілді. Осылай деп ой тұжырып отырғанмен Талдықорған төрінде жаңаша леп ескенін байқағандай күйге бөлендік. Өйткені осы жыл­дың мамыр айында Жетісу облысының әкімі Бейбіт Исабаевтың тікелей қолдауымен алғаш рет облыстық филармония жанынан эстрадалық-симфониялық оркестр құрылған-ды. Осы бір қысқа мерзім ішінде өзіндік сүрлеу-соқпақ тапқан өнер ұжы­мы жетісулықтарға музыкалық кеш ұсынды.

Қос бөлімнен турған рухани шара тыңдармандарды тәнті еткені анық. Елімізге танымал «Қазақстан Камератасы» классикалық музыка ансамблі, Халық әртісі Гауһар Мыр­забекова, Қазақстанның еңбек сіңір­ген қайраткері, профес­сор Бекболат Байсағатов қонақ болған кеш көңілді көкжиекпен астастырғандай әсер қалдырды.

Шынымен де, Дәнеш Рақышев атын­дағы облыстық филармония­ның эстрадалық-симфониялық оркестрі құрылғалы саз қоржынын толық­­ты­рып, өнерпаздарының кәсіби ше­бер­ліктерін шыңдауда үлкен жұмыс­тар атқарғаны кеш барысында көзге шалынды. Арнайы келген қонақтар­мен бірлесе өнер көрсеткен оркестр еңбегін тамашалауға жетісулық зиялы қауым өкілдері молынан жи­­налғанын да айта кеткен жөн. Аймақ басшысының өзі көрермен қата­­рынан табылған рухани кеште «Времена года», «Концерт для флейты», «Мелодия для флейты», «Симфония 29 финал» «Happy new year», «Айттым сәлем Қаламқас», «Piece in jazz-rock», «Chi-mai», «Le lecon partticuliere», «You raise me up», «Vibaldiana», «Lay al your love on me», «Күндер-ай», «Отан таңы», «Шутка», «Вальс» сынды танымал музыка туындылары орындалды.

Қазақ саз әлемінде есімі ерекше ықыласпен айтылатын еліміз­дегі тұл­ғалар мен өңіріміздің мақ­та­ныштары бірлескен концерт өнер­сүйер көпшілікті рухани қазынамен кенелткен де болар деп пайымдаймыз. Сан аспаптан шыққан әсем үнге елтіген біздің көңіл осы пайымға ұласып сала бергені де анық. Десе де композитор Серік Еркімбектің концертке арнайы жазылып, алғаш рет І.Жансүгіров атындағы Мәде­ниет сарайы сахнасында орындалған Тәттімбеттің «Саржайлау» күйінің тақы­рыбындағы jazz and rock ав­тор­лық шығармасынан тартып, ав­­тор­дың өзі, жоғарыда аталған өнер жұл­дыздары, жетісулықтардың мақ­­танышы «Құрмет», «Парасат» ор­ден­дерінің иегері Әли Алпысбаев, халық­аралық байқаулардың лауреаты Медет Есбергеновтермен жалғасқан өнер шеруі көңіл шалқытты.

Қазақтың ақсұңқар ақыны Сұл­­тан­махмұт Торайғыров «…біз­дің қа­зақ әнқұмар халық… Біреу қо­лына домбыра ұстап ән сала бастаса, ойдағы-қырдағысы жиналып, сегіздегі бала, сексендегі шалына дейін қалмай қамалап, айтшы-айтшылап жанын жағасына келті­ре­ді. Бара-бара не болса да сол әндегі рух сүйегіне сіңеді, құлағында қа­лады», деген пікірі әлі де өз қасиетін жоғалтпағандай. Біз соған тағы бір мәрте көз жеткіздік.

 

Жетісу облысы