Дәстүрлі музыка мамандығының студенті Б.Фехер алты тілде еркін сөйлейді. Бір сөзбен оны полиглот деп айтуға болады. Ол Түркістанға қобыз үйренуге келіпті. Елімізге келгеннен кейін қазақ тілін тәп-тәуір меңгеріп алған. Оның қобызға қызығушылығы «Тұран» этно-фольклорлық ансамблінің Мажарстанда болған концертінен кейін оянған.
«2014 жылы біздің елге «Тұран» ансамблі гастрольдік сапармен келді. Керемет концерт қойды. Сол концертті көріп, қазақ өнеріне ғашық болдым. Әсіресе мені қобыздың үні ерекше толқытты. Содан бастап осы аспапты үйренуге ден қойдым. Үйрену үшін аталған ансамбльдің қобызшысы Мақсат Медеубектен онлайн сабақ алдым. Сөйтіп, қобызды әжептәуір меңгердім. Қазір еркін ойнаймын. Енді ұстазым Ерасыл Қауымбаевтан домбыра үйреніп жүрмін», деді ол.
Айта кетейік, Богларка Фехердің композиторлық қабілеті де бар. Қобызға арнап «Дала сыры» атты күй шығарған. Бұдан бөлек мажар тілінде жазған туындылары да жетеді.
Дидар АСЫЛХАН,
Қожа Ахмет Ясауи атындағы Халықаралық қазақ-түрік университетінің 2-курс студенті
