Медицина • 13 Ақпан, 2024

Гидроцефалия диагнозы үкім емес

143 рет
көрсетілді
3 мин
оқу үшін

Мұндай операция бұрын Өске­менді қойып, ірі қалаларда жасала бермейтін. Қазір Ана мен бала орталығының нейрохирург дәрігерлері гидроцефалияға шалдыққан балалардың миына шунт орнату секілді зергерлік шеберлікті қажет ететін операцияларын оп-оңай жасап жүр. Демек, технологияның дамы­ғаны ғана емес, ақ халатты­л­ар­дың біліктіліктері де шыңдалды.

Гидроцефалия диагнозы үкім емес

(фотосуретті ШҚО Денсаулық сақтау басқармасының баспасөз қызметі ұсынды)

– Босану блогымен ты­ғыз байланыста жұ­мыс іс­тей отырып, біз жаңа ту­ған нәрестелерде нейро­хи­­рургиялық ақаулар анық­талған кезде дереу операция жасауға тырысамыз. Мы­салы, патологияның әртүр­лі деңгейлері бар. Әсіресе, омыртқаның туабіткен жа­ры­ғы жиі кездеседі. Егер бұрын гидроцефалия диаг­нозы үкім сияқты естілсе, қазір бұл аурумен Ана мен бала орталығының нейрохи­рургтері сәтті күресіп жүр, – дейді ШҚО Ана мен бала орталығының нейрохирург дәрігері Олжас Азанқұлов.

Аймақтағы Ана мен бала орталығында Самар ауда­нының Шұбарқайың ауылы­нан келген 11 жастағы Камила Байзақова сәби кезінен бас­тап гидроцефалия диагнозымен диспансерлік есепте тұр. Нәрестеге алғашқы шунт екі айында қойылған. Дәрігерлердің айтуынша, кейін Камиланың аяғында әлсіздік пайда болған. Тек­сере келе МРТ нәтижесі жұ­лын  жарығын көрсеткен. Сөйтіп, 2013 жылы сәби кезін­де оған Астана қаласындағы нейрохирургия орталығында жұлын ісігіне операция жасалды. Жалпы, бүгінге дейін бес операцияны басынан өткізіпті.

Жыл сайын Камила анасымен бірге ШҚО-дағы Ана мен бала орталығына келіп, вентрикуло-перитонеальді шунтты тексертеді, оңалту курсынан өтеді, абзал жан­дар­дың қадағалауында болады. Күні кеше ғана жеткін­шекке хирургтер тағы бір операция жасады. Қазір пациент өзін жақсы сезінеді. Үйге шығуға дайындалып жүр. Ана мен бала орталығы дәрігерлерінің айтуынша, ол ауруханада бос қарап жатпайды. Моншақтардан әртүрлі суреттер кестелейді, телефондарға арналған бі­лезіктер жасайды. Жасаған зергерлік бұйымдарын нейрохирургия бөлімінде емделіп жатқан балаларға сыйлап жүр. Кішкентай пациент бөлімде жатқан құрдастарына ғана емес, ересектерге де өміршеңдіктің, төзімділіктің және ақыл-ойдың үлгісін көрсетті.

– Гидроцефалия болған жағдайда жедел медициналық көмекке жүгіну қажет. Ауру­ды кәсіби емдеу және са­уатты оңалту асқынулар мен мүгедектік дәрежесін 60%-ға дейін төмендетуі мүмкін. Шала туған шараналар мен жұлын жарығы бар балалар тәуекел тобына кіреді. Гидроцефалия көбінесе үш айға дейін анықталады. Егер осыдан 20 жыл бұрын гидроцефалия диагнозынан айығып шығу мүмкін болмаса, бүгінде ерте көмек пациенттердің 95%-ын құтқаруға мүмкіндік береді, – дейді «он саусағынан өнер тамған» дәрігер Олжас Азанқұлов.

Айта кетейік, елімізде жо­ға­рыда аталғандай, диагноз қойылған науқастарды емдеу тегін. Барлық шығын МӘМС қаражаты есебінен жабылады.

 

Шығыс Қазақстан облысы