Атырау қалалық полиция басқармасы әйелдерді зорлық-зомбылықтан қорғау тобының инспекторы Әйгерім Орақбаеваның берген мәліметіне сүйенсек, кейінгі екі жылда отбасында зорлық-зомбылыққа қатысты 5 мыңға жуық құқық бұзушылық жасалғаны анықталған. Ал әйелдерге қарсы 15 қылмыстық іс тіркелген.
«Отбасындағы зорлық-зомбылық азаймай отыр. Мәселен, кейінгі екі жылда облыс орталығында осындай 5 мыңға жуық құқық бұзушылық анықталды. Осыған байланысты 4 770 адам Әкімшілік құқық бұзушылық туралы кодексінің 73, 73-1 және 73-2-бабымен әкімшілік жауапкершілікке тартылды. Оның ішінде 3 145 адамға қорғау нұсқамасы шығарылды. Әйелдерге зәбір көрсетуге қатысты 15 қылмыстық іс қозғалды. Қорғау нұсқамасын бір ай ішінде бұзып, агрессиялық мінез-құлық көрсеткен 196 адам осы заңның 461-бабына сәйкес жазаланды», деді Ә.Орақбаева.
Жергілікті полиция қызметі басқармасы әйелдерді зорлық-зомбылықтан қорғау тобының ерекше тапсырмалар жөніндегі аға инспекторы, полиция майоры Раиса Айтжанованың айтуынша, тұрмыстық зорлық-зомбылық көрсетудің бірнеше себебі анықталып отыр. Біріншіден, бұған маскүнемдік әсер етеді. Екіншіден, қызғаныштың соңы кикілжіңге, тіпті зорлық-зомбылыққа ұласады. Үшіншіден, жұмыссыздықтың салдарынан ерлі-
зайыптылар арасында араздық туындайды.
«Биыл қаңтар айында полицияға тұрмыстық зорлық-зомбылыққа ұшырауға байланысты 399 шағым түсті. Оспадар отағасының заңға қайшы әрекетінің кесірінен 15 адам дағдарыс орталығына орналастырылды. Оның ішінде 4 әйел, 11 бала бар. Ал 272 адам Әкімшілік құқық бұзушылық туралы кодексінің 73-бабымен (Отбасы-тұрмыстық қатынастар аясындағы құқыққа қарсы әрекеттер) жауапкершілікке тартылды. Бұлардан өзге 290 адамға қатысты бір ай мерзімге қорғау нұсқамасы шығарылған еді. Бірақ сол кезеңде ерсі мінез-құлқын көрсетіп, қорғау нұсқамасын бұзған 19 адам жазаланды. Мәжбүрлеп емдеу мекемесіне 3 адам жіберілді», дейді Р.Айтжанова.
Оның айтуына қарағанда, Атырау қаласында дағдарыс орталығы, Жылыой мен Құрманғазы ауданында арнайы кабинет ашылған. Мақсат – отбасында зорлық-зомбылыққа ұшыраған әйелдерге қолдау көрсету.
«Жуан жұдырығын ала жүгіретін күйеуінен зәбір көрген әйелдер немесе осындай оқиғаға куә болғандар ішкі істер органына арызбен жүгінуі қажет. Полиция қызметкерлері жәбірленушілерге құқықтық кеңес, психологиялық көмек көрсетеді. Жәбірленушілерді әпербақан күйеуден қорғау үшін жеке профилактикалық шараларды қолға алып, дағдарыс орталығына бағыттайды», деп түсіндірді Р.Айтжанова.
Атырау облысы
