Өңешті тоқішекпен алмастырды

Өкінішке қарай, ата-анасы, үйдегі ересек адамдар қауіпті химиялық, ыстық немесе тұрмыстық заттарды дұ­рыс сақ­та­маудың салдарынан кіш­кентай балалардың тамағы, асқазаны күйіп қалатын оқиғалар аз емес. Осының кесірінен балалардың 70-80%-да өңеш тыртығы пайда болып, тарылады. Өңеш тыртығы тарылған балаларға алғашқы кезде гастростома салынып, жіппен, арнайы буж арқылы ұзақ уақыт сүмбілейді. Бірақ 20-30% жағдайда өңеш бойы түгел тыртықтанғандықтан, сүмбілеу әдісін қолдану қиын. Осының салдарынан кейбір балалар мүге­дек­тікке душар болса, кейде көз жұматын кездері де болады.

Ал жыл сайын Педиатрия және балалар хирургиясы ғы­лыми орталығына еліміздің әр өңірінен өңешіне зақым келген 100-ден аса бала келіп түседі. Сол сияқты жуырда Педиатрия және балалар хирур­гиясы ғы­лы­ми орталығына Қызылорда облысынан «өңештің күйік­тен кейінгі тыртықты тарылуы» диагнозымен 3 жасар қыз бала шұғыл жеткізілген еді. Есі кір­меген сәби «Чистый казан» деген сұйықтықты ішіп қойған. Күйіктен баланың өңеш саңылауы толығымен тыр­тықтанып қалғандықтан, бас­тапқыда ол іштің алдыңғы қабыр­ғасынан шығарылған асқа­зандағы арнайы түтік арқылы тамақтандырылған. Сондықтан клиникада өңешті толығымен тоқ ішекпен алмас­тыру операциясын жасауға тура келді. Жылына орта есеппен дәл осындай 6-7 операция әртүрлі әдіс­ті қолдана отырып жаса­лады.

Бұл операцияның бірегейлігі – маман­дар ас өтпейтін өңешті тоқ ішекпен алмастырды. Опе­ра­ция 6 сағатқа созылып, тоқ ішектің бір бөлігі кеуде қуысы арқылы жүргізіліп, мойын­дағы өңештің жұтқыншақ бөлі­гімен жалғастырылды. Мұндай операциялар зергерлік дәлдік пен үлкен машықты талап ете­тіндіктен, операцияны үш бір­дей білікті хирург – хирургия бөлімінің меңгерушісі Мөлдір Қалабаева, Нұржан Афлатонов пен Нышанбек Шыланбаев жасады.

Қазіргі таңда Мадина есімді кішкентай пациенттің денсау­лығы дұрысталды, дәрігер­лер­дің жоспарлы бақылауында тұр. Өңеш­тің қызметін енді тоқ ішектің бір бөлшегі атқара алатындықтан, өздігінен тамақ­тана алады.

Жалпы, жыл сайын Пе­диат­рия және балалар хирур­гиясы ғылыми орталығында еліміздің әр өңірінен келген, ас қорыту жолдарында туабітті мен және жүре келе пайда болған аурулары бар 400-ден аса балаға күрделі операция жасалады. Мамандар тұрмыстық хи­мия­лық заттардың дұрыс сақ­тал­мауынан, есі әлі кірмеген балалар ішіп қо­йып, жоғарыдағыдай ауыр диаг­ноз­дар­ға душар болып жатқанын айтады.

АЛМАТЫ