Өңірлерді дамыту және мемлекеттің өңірлік саясатын тиімді іске асыру – Сенат жұмысындағы негізгі бағыттардың бірі. Өз сөзінде Мәулен Әшімбаев Парламент кейінгі жылдарда өңірлердегі проблемаларды шешуге арналған ондаған заң қабылдағанын атап өтті.
Қазіргі таңда елімізде мәслихаттардың қоғамдық-саяси маңызы арта түсті. Осыған байланысты Парламент Сенатының ұйытқы болуымен еліміздегі мәслихаттар институтының 30 жылдығына орай 2024 жылғы 18–19 сәуір күндері халықаралық конференция өткізу жоспарланып отыр.
Айта кетейік, 5 наурызда Мемлекет басшысы Қасым-Жомарт Тоқаев Сенат төрағасы Мәулен Әшімбаевты қабылдады. Кездесуде Палата спикері реформаларды заңнамалық тұрғыдан қамтамасыз ету жұмыстарының өткен айлардағы қорытындысы және алдағы кезеңге арналған жоспары жөнінде баяндады. Қабылдау кезінде берілген тапсырмалардың бірі – Парламенттің заң шығару қызметіне жергілікті өкілді органдардың депутаттарын кеңінен жұмылдыру.
«Президент Қасым-Жомарт Тоқаев елімізде жүргізіліп жатқан реформаларды заңнамалық тұрғыдан қамтамасыз етудің ерекше рөлін және Палатаның өңірлерді дамытуға тигізіп келе жатқан зор ықпалын атап өтті. Конференция алаңында Мемлекет басшысының бастамасымен қолға алынған саяси және экономикалық реформаларды іске асыру кезіндегі мәслихаттардың рөлі жан-жақты талқыланады. Қуатты өңірлер әлеуметтік-экономикалық әл-ауқаттың негізі және елдің драйвері екені анық. Сондықтан өңірлердің теңгерімді дамуына және мәслихаттардың нәтижелі жұмыс істеуіне ықпал ету жолында күш жұмылдырудың маңызы зор», деді Мәулен Әшімбаев.
Халықаралық конференцияға Парламент депутаттарымен бірге барлық деңгейдегі мәслихаттардың төрағалары, сондай-ақ қазақстандық және шетелдік сарапшылар қатысады деп жоспарланып отыр.
