Коллажды жасаған – Қонысбай ШЕЖІМБАЙ, «EQ»
Атырау облыстық құрылыс басқармасының басшысы Нұрберген Құсайыновтың айтуынша, тұрғын үйлердің құрылысын күзде аяқтау көзделген. Құрылыс компаниялары алғашқы кезекте 80 жеке үйдің құрылысын қолға алады. Бұл үйлер «Қазақстан халқына» қоғамдық қорының қаражаты есебінен салынады. Шағын ауданда осы кезге дейін жолдан өзге инженерлік коммуникациялар жүргізілген.
«Атырау облысының әкімдігімен қол қойылған арнайы меморандум бар. Соған сәйкес жергілікті атқарушы орган жаңа үйлер салу үшін жер учаскелерін су баспайтын қауіпсіз аумақтан бөлуді қамтамасыз етеді. Жергілікті атқарушы орган құрылыс жүргізу мерзімі мен техникалық талаптардың сақталуын, құрылыс жұмыстарының сапасын бақылайды», дейді Н.Құсайынов.
Тасқын судан зардап шеккен құлсарылықтарды толғандыратын жайт – өтемақы мәселесі. Осыған алаңдаған 1 мыңнан аса тұрғын өтемақы мәселелері бойынша 109 бірыңғай байланыс орталығына жүгініпті. Орталық басшысы Ақмарал Батырханованың айтуынша, Жылыой ауданында төтенше жағдай жарияланған 4 сәуірден бері 6 мыңнан аса қоңырау түскен.
«Құлсары қаласының тұрғындары бағалау қорытындысын дайындау, өтемақы алу мерзіміне байланысты сауалды жиі қояды. Күнделікті тұтынатын ауызсудың сапасы, жалған ақпаратты анықтау мәселесіне алаңдайды», дейді А.Батырханова.
Өтемақы демекші, кейінгі күндері бұл қаржыны алып жатқан құлсарылықтар қатары көбейіп келеді. Мәселен, 23 мамырға дейін тасқын судан зардап шеккен 357 тұрғын өтемақы алу үшін келісімшартқа қол қойды.
«Арнайы құрылған жұмыс комиссиясы 1 500-ден аса нысанды бағалау қорытындысын дайындады. Үйі суға кеткендіктен, өтемақы алу туралы келісімге қол қойған 109 тұрғынның жеке есепшотына өтемақы қаражаты аударылды», деп мәлімдеді облыстық жедел штабтан.
Көп жылдан бері Құлсары қаласында тұратын Нұршат Әуелбайдың айтуынша, бағалау компаниясы есептеп, ұсынған қаржы өзінің есебімен сәйкес келген. Өйткені оның үйі апатты деп танылып отыр. Енді сол үйді бұзады.
«Су кірген үйімнің құны әділ бағаланды. Есепшотыма түсетін өтемақы шығынымды толығымен жабады. Ақшалай өтемақыға жаңа үй сатып алатын шығармын. Реті болса, жаңа үй салуым мүмкін. Қазір бұл мәселені отбасымызбен ақылдасып отырмыз», дейді Н.Әуелбай.
Ал Күнзира Тәжіғұлованың үйіне кірген тасқын су метр деңгейінде сақталып тұрған. Әрине, бірнеше күн тасқын судың ортасында тұрған үйде бұдан былай тұру мүмкін емес. Сол себептен оның үйі апатты жағдай екені бағалау жүргізген комиссияның шешімімен расталған. Ал үй иесі енді бүлінген баспанасын бұзып, жаңасын салуды көздеп отыр.
Ұзақ жыл берекелі тірліктің ұясы болған баспанасы апатты деп танылғандардың қатарында Гүлбаршын Қоңырбаева да бар. Қазір ол өтемақы төлеу туралы келісімге қол қойған.
«Үйіміз апатты деп танылған соң ақшалай өтемақы алу үшін 19 мамырда барлық құжатты тапсырған едік. Содан соң банктен есепшот аштық. Сол есепштотқа 21 мамырда өтемақы қаржысы аударылды. Енді жаңа үй сатып аламыз», дейді Г.Қоңырбаева.
Моноқаланың байырғы тұрғынының бірі Галина Қаражанова 20 мамырда ақшалай өтемақы алу мақсатында құжат тапсырыпты. Оның да есепшотына 21 мамырда мүліктік залал үшін қаржы түскен.
Тағы бір құлсарылық Мейрам Тілекбаев бағалау парағында көрсетілген қаржыға келісімін беріпті. Қазір ақшалай өтемақы алу үшін құжат жинап жүр.
«Менің үйім тұруға қауіпті деп танылды. Қазір бұзылып жатыр. Жақында мамандар маған бағалау қорытындысының парағын әкелді. Келтірілген шығынға байланысты есептелген қаржы көлеміне көңілім толады», деді М.Тілекбаев.
Облыстық жедел штабтың мәліметіне сүйенсек, Құлсары қаласында тұрғындарға бағалау қорытындысын таныстыруға 20 мобильді топ жұмылды. Бұл топтардың мүшелері күшейтілген режімде жұмыс істеп жүр. Олардың жұмысы тұрғындардың бүлінген мүлкін бағалау аяқталғанға дейін созылады. Ал бағалау жұмысын осы аптаның соңына дейін аяқтау көзделген.
Атырау облысы
