Сондай-ақ осы Әлеуметтік кодекс аясында мүгедектігі бар азаматтарға қатысты көптеген жүйелі өзгеріс енгізілді. Қызылорда облысына сапармен келген Еңбек және халықты әлеуметтік қорғау вице-министрі Назгүл Сағындықова облыс тұрғындарымен кездесуде әлеуметтік қолдаудың осындай қадамдары туралы кеңінен айтты.
Қазір атаулы әлеуметтік көмекті есептегенде өңірлік ең төменгі күнкөріс деңгейіне мән берсек, 2025 жылдан бастап бұл есептеулерде медианалық табыс негізге алынады. Бұл АӘК мөлшерін біршама көтереді.
«Атаулы әлеуметтік көмекті есептегенде табыс көздерін ғана емес шығысты да ескеру өте маңызды. Мемлекет басшысының бастамасымен қолға алынған бұл жаңалық келер жылы жүзеге асырыла бастайды. Жалпы, Әлеуметтік кодекс аясында мүгедектігі бар азаматтарды қолдау жүйесін трансформациялау қарастырылған. Мысалы, денсаулық сақтау, білім жан басына шаққандағы қаржыландыруға көшіп, ол салаларға жеке бизнес келе бастады. Осы арқылы жеке емдеу мекемелері, жекеменшік мектептер мен балабақшалар пайда болды. Кодекс шеңберінде енді жақсы нәтиже көрсеткен жан басына шаққандағы қаржыландыру тәсілі біздің салада да қолданыла бастайды. Осы күні ауылдарда инфрақұрылым жоқтығынан мүгедектігі бар азаматтар қалаға көшіп жатыр ғой. Енді біздің тарифтерді пайдалану арқылы бизнес жергілікті жерлерде азаматтарға қолайлы жағдай жасайды», дейді вице-министр.
Арнаулы әлеуметтік қызметтердің қолжетімділігін арттыру және әлеуметтік сақтандыру жүйесін жаңғырту мәселелері сөз болған кездесуде министр орынбасары өткен жылғы атқарылған жұмыстар қорытындысын да баян етті. Мысалы, «Отбасының цифрлық картасы» осы саладағы тиімді құрал болып отыр. Көпбалалы отбасыларды қолдау қадамдары да нәтижесіз емес. Мысалы, 2019 жылы еліміз бойынша осы қатарда 230 мың отбасы болса, бес жыл ішінде олардың саны 2,5 есеге артқан.
Вице-министр былтыр жергілікті атқарушы билік Қызылорда облысында 366 нысанды мүгедектігі бар адамдардың барлық санаты үшін бейімдегенін атап өтті.
Кездесуден кейін вице-министр тұрғындарды жеке қабылдады. Сапар аясында ол балаларға арналған арнаулы әлеуметтік қызметтер көрсету орталығының жұмысымен танысып, тұрмыстық зорлық-зомбылықтан зардап шеккендерге әлеуметтік қызметтер көрсететін орталыққа барды.
Қызылорда
