Қалалық әкімдіктің баспасөз қызметінің дерегіне сүйенсек, қазіргі кезде 35 жоғары оқу орнында 199 мыңнан астам студент білім алып жатқан болса, олардың жүз мыңнан астамын қала сыртынан келіп оқитын студенттер құрайды. Ал мегаполисте 109 жатақханада тұрып жатқан студенттер саны 36 мыңнан асады.
Жатақхана жетіспеушілігінің алдын алу, студенттерді дер кезінде баспанамен қамту мақсатында былтыр наурыз айында қалалық әкімдік Ғылым және жоғары білім министрлігімен бірлесіп, жобалық кеңсе ашқан болатын. Жобалық кеңсе жатақханалар салу мен студенттерді тұрғын үймен қамтамасыз ету жөніндегі мемлекеттік бағдарламаны іске асыру үшін қолайлы жағдай жасай отырып, қалалық әкімдік пен Қаржы орталығы тарапынан тұрғын үй құрылысына мүдделі жоғары оқу орындары, әлеуетті инвесторларға шұғыл заңгерлік, консультациялық, сараптамалық көмек көрсетеді. Бүгінде жобалық кеңсе қызметіне 120 инвестор жүгінген. Осы мақсатта жаңа оқу жылында ашылуы жоспарланып отырған Narxoz Housing инклюзивті студенттік жатақхана құрылысын атап кетуге болады.
Университет аумағында акционердің өз қаражаты есебінен салынып жатқан жатақхана білім беру гранты әрі коммерциялық негізде оқитын студенттер үшін де қолжетімді. Мұнда ерекше қажеттіліктері бар студенттерге арналған арнайы бөлмелер де қарастырылған. Жобаға сәйкес, 424 орындық заманауи жатақханада инклюзивті бөлмелер, асхана, медициналық орталық, интернетке қолжетімді коворкинг-аймақ, оқуға және демалуға арналған бөлмелер студенттер үшін жайлы болмақ.
Осылайша, қаладағы орын тапшылығын шешуді уәде етіп отырған қалалық әкімдік дерегіне сүйенсек, былтыр 3 969 төсектік орынға арналған 14 нысан пайдалануға беріліп, жатақханаларда орын жетіспеушілігі 32,7 мыңнан 28,7 мыңға азайып отыр. Биылғы жоспар бойынша жоспардағы көрсеткіш 4 мың төсектік орынды құрайды. Жаңа оқу жылында 1 165 төсектік орынға арналған 5 нысан пайдалануға берілетін болады.
АЛМАТЫ
