«Астана – Париж 2024: параспорт және Паралимпиада ойындары – басты назарда» деген атаумен өткен фотокөрмені көпшілік тамашалады. Францияның Ұлттық мерекесіне орай әрі Париж Олимпиадасының басталуына екі апта қалғанда Францияның Қазақстандағы елшілігі, Ұлттық Паралимпиада комитеті, Астана қаласының әкімдігі және Дене мүмкіндіктері шектеулі тұлғаларға арналған спорттық даярлау орталығы ұйымдастырған көрмеде спортшылардың суреті жұрт назарына ұсынылды. Әр портреттің тұсындағы QR-код арқылы тамашалаушылар спортшы туралы тереңірек танысып біледі.
Атырау көпіріндегі көрмені 14 тамызға дейін қала тұрғындары мен қонақтары тамашалай алады. Француз фотографы Дидье Эшлар мен Оспан Әлінің нысанасына ілінген фотодағы кей параспортшылар Париж жазғы паралимпиадасында ел үмітін арқалайды. Солардың бірі – Жаңыл Балтабаева. Параканоэден алғаш рет додаға қосылатын қайсар қыздың бұл спорт түрімен шұғылданғанына бір жылдан асыпты.
«Мен бұған дейін қысқы спорт, оның ішінде шаңғыдан Паралимпиада ойындарына қатыстым, бірақ жүлде бұйырмады. Параканоэ спортымен шұғылданғаныма бір жылдан асты, осы уақыт аралығында паралимпиада жолдамасын олжаладым, мен үшін зор жетістік. Себебі Мажарстанда өткен әлем чемпионатында дүниежүзінің таңдаулы ескекшілерімен додаға түсіп, лицензия иелендім. Саусақтарымның жоқтығынан жел соққанда ескегімді есу қиындық тудырды. Соған қарамастан бапкерімнің айтқанын тыңғылықты орындап, төрт жылда айналып соғатын Паралимпиада аламанына қатысуға мүмкіндік алдым. Енді барымды салып, әзірлікті күшейтемін», деген Жаңыл Балтабаева бұл спортта тек тәртіпке бағынып, бапкердің талабын орындай алғанда ғана нәтиже шығатынын айтты.
Қайсар қыз қысқы спортқа қарағанда жазғы спорт түрі анау айтарлықтай ауырлық етпейтінін жеткізді.
«Шаңғы биатлоннан сайысқа қатысқанда аяғыма да көп күш түсетін, үстіміздегі киімнің қалыңдығы да аз жүк емес. Жазғы спортта, оның ішінде ескек есуде ондай қиындық тумайды. Бірақ бұл спорттың да өзіндік ерекшелігі бар. Кімнің қажыр-қайраты күшті, төзімі мығым, сондай жандар ғана нәтижеге жетеді», деді спортшы.
Мәжіліс депутаты Кенжеғұл Сейітжан мұндай іс-шараларды жиі ұйымдастыру арқылы мүмкіндігі шектеулі жандардың қайсарлығы мен еңсеріп жүрген спорттағы жетістігін насихаттау маңызды дейді. Ол параспорттан спортшылардың әлемдік додаларда олжалаған медалі мен нәтижесі жоғары болғанымен, бөлінетін қаражат әлдеқайда кемшін екенін айтты.
«Мұндай іс-шара не үшін керек? Ең алдымен, халықты параспорттың тыныс-тіршілігімен таныстыру үшін қажет. Кезінде голбол деген спортты дамытып, жетекшілік еттім, паравелоспорт федерациясының басшысы ретінде бұл саланың ой-қырын тереңдей білемін. Кәсіби спортшылар секілді параспортшыларға да қойылар талап жоғары, сайыс кезіндегі бәсекелестік те әлсіз емес. Мүгедектігі бар спортшыны осындай додаға дайындайтын бапкерге жүктелер жауапкершілік те, салмақ та орасан. Бірақ жалақысы мардымсыз. Парламент мінберінде бұл мәселені дүркін-дүркін қозғап келемін. Параспортты дамыту арқылы да ұлт саулығын нығайтамыз», деді депутат К.Сейітжан.
28 тамыз бен 8 қыркүйек аралығында өтетін Паралимпиада ойындарына саңлақтарымыз 8 спорт түрінен 21 жолдама иеленді. Атап айтқанда, парапауэрлифтингтен – 5, паражеңіл атлетикадан – 3, паражүзуден – 4, волейболды отырып ойнаудан – 1, параүстел теннисінен – 1, паратаеквондодан – 3, параканоэден – 2 және параоқ атудан 2 жолдама бар.
