Стенд атудың скит түрі бойынша аралас командалық сайыста Эдуард Ещенко мен Әсем Орынбай іріктеу турнирінде небәрі 140 ұпай жиып, 12-орынды қанағат тұтты. Бұл көрсеткіш жерлестерімізге финалға шығу үшін жеткіліксіз еді. Ольга Сафронова 200 метрге жүгіруде жұбаныш бәсекелеріне қатысты. Бірақ ол да сенімді ақтамады. Бес қарсыласының бірде-біреуінен оза алмаған Сафронова ең соңғы орында қалып қойды.
Дүйсенбіде балуандардың бәсекесі басталды. Алғашқы болып бозкілемге грек-рим күресі шеберлері шықты. 60 кг салмақ дәрежесінде өнер көрсеткен Айдос Сұлтанғали тұсаукесер кездесуін Жоламан Шаршенбековке қарсы өткізді. Сыр бойынан келген сайыпқыранның әлем чемпионатының алтыны мен күмісін екі реттен олжалап, Азия ойындарының жеңімпазы, Азияның үш дүркін чемпионы және екі дүркін финалисі атанған 24 жастағы атақты қырғыз балуанына әлі жетпеді. Ол 3:6 есебімен есе жіберді. Содан кейін тек қырғыздар ғана емес, барша қазақ жанкүйерлері де Жоламанның жолына үлкен үмітпен қарады. Өйткені ол ақтық сынға дейін алқынбай жетсе, Айдосқа қола медаль үшін таласу мүмкіндігі туындайды. Бірақ үкілі үміт ақталмады. Қырғызстанның саңлағы ширек финалда Румыния спортшысы Разван Арнаутты айқын басымдықпен (9:0) ұтқанымен, жартылай финалда Жапонияның жұлдызы Кэнъитиро Фумитадан айласын асыра алмады – 3:4. Енді шешуші айқас Фумита мен қытайлық Лигуо Цао арасында өтеді. Ал үшінші орын үшін таласатын Шаршенбеков пен солтүстіккореялық Ри-Се-Уннің қарсыластары жұбаныш белдесулерінен кейін анықталады.
130 кг салмақта Әлімхан Сыздықов күресті. Жарысты ол сәтті бастады. Шымкенттік балуан алғашқы айналымда әлем чемпионатының қола жүлдегері, Еуропа чемпионы, румыниялық Алин Чираруды 3:1 есебімен басым түсіп, жанкүйерлерді бір желпіндіріп тастады. Одан кейін Рио Олимпиадасының қола жүлдегері, Әлем кубогінің иегері, Азия ойындары мен чемпионатының жүлдегері Сабах Шариатимен айқасты. Бұл тартыс Әзербайжанның намысын қорғап жүрген 35 жастағы ирандық легионердің пайдасына шешілді – 0:4. Жартылай финалда Сабах сан соғып қалды. Олимпиаданың төрт дүркін чемпионы Михайн Лопес оны еш қиналмай-ақ еңсерді – 4:1. Әзербайжандық жеңілгеннен кейін Әлімхан үшін де жарыс аяқталды.
Бір айта кетерлігі, Олимпиадада 3 (0 алтын+1 күміс+2 қола), әлем чемпионатында 10 (5+3+2), Еуропа біріншілігінде 13 (11+2+0), Әлем кубогінде 2 (1+1+0) реттен жеңіс тұғырына көтеріліп, Еуропа ойындары мен Дүниежүзілік универсиадада топ жарған Рыза Каялп бұл жарысқа қатыспады. Дәп сол Түркияның тарланы даңқы жер жарған Михайн Лопестің дүбірлі додалардағы бітіспес қарсыласы еді. Екеуінің жолы үнемі шешуші тұста қиысатын. Алайда күні кеше ғана әйгілі балуанның допинг қолданғаны анықталып, Каялп бірер жылға үлкен спорттан шеттетілді. Содан кейін жер-жаһан жанкүйерлері Бостандық аралынан ат терлетіп келген апайтөсті 2023 жылғы әлем чемпионы және 2022 жылғы сол жарыстың күміс жүлдегері, Азиаданың жеңімпазы, 26 жастағы ирандық Әмин Мырзазаде тоқтататын шығар деп ойлады. Қанша дегенмен ол Лопестен бақандай 15 жас кіші. Қазір Парсы пехлеванының нағыз жалындап тұрған шағы. Біраз уақыттан бері көптеген байрақты бәсекеде Әминнің асқан шеберлігіне тәнті болып, зор әлеуетін байқаған едік. Алайда Париж төрінде 41 жастағы азулы арыстан жас жолбарысқа алдырмады. Бұл бәсекеде Бостандық аралының балуаны асықпай-аптықпай жүріп-ақ, сауатты тактикасы арқылы Мырзазадені жолынан ығыстырды – 3:1. Сөйтіп, финалда Михайн Лопес пен чилилік Ясмани Акоста күш сынасады. Ал Сабах Шариати мен қытайлық Линчжэ Мэннің қарсыластары сәл кейінірек белгілі болады.
Сол күні әйелдер күресі шеберлері де өз өнерін ортаға салды. Олар 68 кг салмақ дәрежесінің жүлделері үшін тартысты бастады. Бастапқы бәсекелерде барлық қарсыласын сыпыра ұтқан Мейірім Жұманазарова мен Эмит Элор жартылай финалда да жеңіске жетті. Қырғыз қызы үшін жеңіс оңайлықпен келген жоқ. Ол Токио Олимпиадасының күміс жүлдегері, Африканың 13 дүркін чемпионы, нигериялық Блессинг Оборудудуданы әупірімдеп жүріп әзер ұтты. Ал АҚШ-тың аруы солтүстіккореялық Пак Сол-гумды жығып алды да, аяғынан мықтап ұстап, бозкілемде шыр айналдырды. Сөйтіп, есеп 10:0-ге жеткенде барып қана тоқтады. Дәл осы тәсілді Элор осыдан екі жыл бұрын Белградтағы әлем чемпионатының финалында біздің Жәмила Бақбергеноваға қарсы сәтті қолданған еді. Сол кезде 18 жастағы бойжеткен әлем чемпионы атанса, келесі жылы сол нәтижесін қайталады. Міне, енді 20 жасында Олимпиаданың алтын тұғырына көтерілуге шақ қалды. Ол үшін Эмит Элор Токиодағы ойындардың қола жүлдегері, әлем чемпионы Мейірім Жұманазарованы жеңуі керек. Бірақ Алатаудың бөктерінен келген бұрымдының да оңайлықпен беріле қоймайтыны анық. Сол себепті де алда көрерменді кескілескен айқас күтіп тұр деп айтуға толық негіз бар.
Бұл күндері дүйім жұрт боксшылардың бәсекелерін де тағатсыздана күтіп жүргені рас. Қазірдің өзінде кейбір салмақ дәрежесінде бас жүлде үшін айқасатын арландар мен тарландар анықталып та қойды. Тарқатып айтсақ, 51 кг салмақта Хасанбой Дусматов (Өзбекстан) пен Біләл Беннама (Франция), 63,5 кг салмақта Софьян Умиа (Франция) мен Эрисланди Альварес (Куба), 80 кг салмақта Нұрбек Оралбай (Қазақстан) мен Александр Хижняк (Украина) және 92 кг салмақта Лорен Альфонсо Домингес (Әзербайжан) пен Ләзизбек Муллажонов (Өзбекстан) жұдырықтасады. Тағы үш жұп алдағы күндері анықталады. Сол секілді әйелдер де шаршы алаңға шығады. Бұл бәсекелерде күллі қазақ жанкүйерлері Назым Қызайбайға үлкен үміт артып отыр. Аса жеңіл салмақтағы қазақ қызы Қытай боксшысы У Юмен қолғап түйістіреді.
