Ербол Шаймерденовтің 70 жылдығын жерлестері С.Мұқанов атындағы облыстық ғылыми-әмбебап кітапханасында мамыр айында атап өткен. Дәл сол уақытта ақынның мерейтойы Астана қаласында үлкен мемлекеттік шара ретінде аталып, туған жеріне қаламдас достары мен зиялы қауым өкілдері келе алмаған еді. Осы олқылықтың орнын толтыру мақсатында өткен аптада сенатор Нұртөре Жүсіп бастаған бір топ қоғам қайраткері, ақын-жазушылар Қызылжар өңіріне, ақынның туған жеріне келді. Делегация құрамында көрнекті жазушы Қуаныш Жиенбай, филология ғылымдарының докторы, ақынның досы, филология ғылымдарының докторы, профессор Құдайберген Тұрсын, қаламгердің жары Күләш Шаймерденова, әуесқой композитор Құдиярбек Ағыбаев, айтыскер ақын Рауан Қайдар және Ерекеңнің бір топ туысы болды.
Осы топтың қатысуымен С.Мұқанов атындағы облыстық ғылыми-әмбебап кітапханасының үлкен залында зиялы қауым өкілдерінің кездесуі ұйымдастырылды. Оны облыстық мәдениет басқармасының басшысы Санат Әубәкіров ашып, қонақтарды облыс әкімі Ғауез Нұрмұхамбетов атынан құттықтап, сәт-сапар тіледі. Қонақтар арасынан сөйлеген жазушы Қуаныш Жиенбай Ерекеңнің адамгершілік қырларына тоқталды. ҚазМУ-да бірге оқығанын, Ержұман Смайыл, Сүлеймен Мәмет сынды тұлғалармен достық қарым-қатынастарын еске алды. «Ербол бізден жас болса да, салмақты ойымен, парасатты мінезімен нағыз сырбаз еді. Ол жастайынан көзге түсіп, әдебиетте де Ә.Нұрпейісов сияқты тым талғампаз корифейлердің өзін ерте мойындатты», деді. Сенатор Нұртөре Жүсіп бүгінгідей алмағайып заманда Ербол ағадай кемеңгер адамдар болса, еліміздің ертеңіне жауап іздеп, стратегиялық мақсаттарымызды айқындауға белсене қатысар еді деп оның өмірден беймезгіл өткенін өкінішпен ауызға алды. Ақынның адамгершілік қырларына тоқталып, қамқорлығын көргенін жеткізді. Жасанды интеллект қарыштап дамып келе жатқан бүгінде Ербол Шаймерденовтің жинаған даналықтары, әсіресе қазақ афоризмдері компьютер бағдарламаларына түгел енгенін қалайтынын айтты. Сонымен бірге Ербол Шаймерденов тәуелсіздіктің елең-алаңында Алматыда жазылған «Без правых и левых» деген кітаптың тұсаукесерін Мәскеуде ұйымдастырғанын еске алды. «Сондай тамаша ұйымдастырылған тұсаукесерді өз басым содан бері көргенім жоқ», деп ақтарылды Н.Жүсіп.
Ақынның курстас достарының бірі Құдайберген Тұрсын Ербол Шаймерденовтің студенттік жылдарда бірден көзге түсіп, Ержұман Смайылмен қатар белгілі тұлғаға айналғанын айтты. «Екеуі де біздің курсымыздың ақылы мен сабыры, барлық жақсы істің ұйытқысы болған еді», деді ол. Құдиярбек Ағыбаев өзі кәсіпқой композитор болмаса да, Е.Шаймерденовтің бірнеше өлеңіне ән шығарғанын қосты. «Оның байыпты жырлары әнге сұранып тұратын. Туған қаласы туралы «Город мой родной» деген өлеңіне орысша да ән шығардым. Артынан қазақша «Қызылжарым» деген ән де өмірге келді», деді ол.
Белгілі айтыскер ақын Рауан Қайдар осы кешке арнаған толғауын орындап берді. Ал жергілікті зиялы қауым өкілдері арасынан журналист Жарасбай Сүлейменов пен ғалым Зарқын Тайшыбай өздерінің Ербол Шаймерденов туралы ойларын ортаға салды. Ақынның жары Күләш жеңгеміз жыр кешіне қатысқан жандарға алғыс айтты.
Келесі күні астаналық қонақтар ақынның туған ауылы Жаңажолдағы Сәбең кітапханасында тағы бір тамаша жыр кешіне қатысты. Ол артына бірнеше жыр жинағын қалдырған, Саттар Сейітқазин, Сағат Әшімбаев, Тұманбай Молдағалиев сынды ақын-жазушылармен жақын араласқан журналист Тоқтар Зікіриннің 75 жылдық мерейтойы еді. Осыдан екі жыл бұрын қатерлі індет өмірін үзіп кеткен Тоқаң сезімді жырларымен республикаға біршама танымал болды. «Дәм-тұзым таусылғанша татып жеген, Адам боп қалуды мен мақұл көрем. Өткіземін әр сөзді ой-електен, Жазылып жатқандайын ақырғы өлең», деп жырлаған әлеуметтік лириканың шебері Тоқтар Зікіриннің өлеңдерінен сезімді селт еткізетін өрнекті жырларды көп табуға болады.
Әкесіз өскен Тоқаң Қарағандының кооператив институтын бітіріп, ұзақ жыл өз мамандығы бойынша қызмет атқарған. Бірақ ақын жүрек әдемі жырға елегізіп, ақыры оны қаламгерлікке әкеледі. Алдымен облыстық «Солтүстік Қазақстан» газетінің Шал ақын, Тимирязев аудандарындағы арнаулы тілшісі ретінде еңбек етіп, өткен ғасырдың 90-жылдарынан Петропавл қаласына орнығып, зейнетке шыққанша облыстық газеттің беделді журналистерінің бірі болды. Бала мінезді Тоқтар Зікірин жас-кәріге бірдей жағып, салмақты, сабырлы, байсалды мінезінен айнымаған. Бұл туралы жыр кешінде сөйлеген жандардың бәрі де жүректерінен ақтарылды. Соның ішінде құрдасы, бала кезден бірге өскен досы Жарасбай Сүлейменов, әріптестері Нұрсайын Шәріп, Нәзира Құрманкина, Қошан Қали, ақындар Дәстен Баймұқанов, Марал Оспанова, тағы басқалар айтты.
