«KAZ Minerals» компаниясының баспасөз қызметі хабарлағандай, орын алған оқиғалардың мән-жайы мен себептері анықталып жатыр. Қайғылы жағдайларды тергеу үшін арнайы комиссиялар құрылды. «KAZ Minerals» директорлар тобы кеңесінің төрағасы Олег Новачук жазатайым мән-жайды білуге өңірге барып, қара жамылған отбасыларға жан-жақты көмек көрсетілетінін айтты. Сонымен қатар жергілікті билік те көмек қолын созатынын жеткізді.
– Бұл – қайғылы жағдай. Біз асыраушысынан айырылған отбасыларға балаларды оқыту және басқа да өмірлік жағдайларға қатысты толық көмек көрсетеміз. Осы оқиғаның егжей-тегжейіне жетуге біз компания басшылығын күтеміз, – деді облыс әкімі Ермек Көшербаев.
Сондай-ақ облыс әкімі оқиға орнында облыстық полиция департаментінің басшылығымен барлық қажетті тергеу жұмысының жүргізіліп жатқанын атап өтті. Анық болғандай, қаза болған жұмысшылардың екеуі «Востокцветмет» ЖШС қызметкерлері, екеуі мердігер ұйымдардың қызметкерлері еді. Оқиға орнында тағы бір жұмысшы зардап шегіп, ауруханаға жатқызылған. Дәрігерлердің хабарлауынша, оның жағдайы тұрақты.
Өңір басшысы Ермек Көшербаевтың айтуынша, облыста жедел штаб құрылған.
Арнайы комиссия қайғылы жағдайдың мән-жайын анықтау үшін жұмыс жүргізіп жатыр.
Жалпы, «KAZ Minerals» – елімізде заманауи, ірі ауқымды, аз шығынды карьерлік типтегі тау-кен өндірісін дамытуға бағытталған, өсу әлеуеті зор мыс өндіруші компания. Топ операциялық іс-қызметін Абай облысында орналасқан Ақтоғай және Павлодар облысындағы Бозшакөл ашық кеніштерде, Шығыс Қазақстан, Абай облыстарындағы үш кеніш пен кен байыту фабрикаларында, Қырғызстандағы Бозымшақ мыс-алтын кенішінде жүргізеді. Компания 2019 жылы сатып алынған «Баимская» мыс жобасының банктік техникалық-экономикалық негіздемесін әзірлеуді аяқтады. Ресейдегі «Баимская» лицензиялы алаңының аумағында орналасқан Песчанка кен орнының ресурстары JORC кодексіне сәйкес бағаланып, кендегі мөлшері 0,39% болатын 10,4 млн тонна мысты және үлесі 0,21 г/т болатын 17,5 млн унция алтынды құрайды. Ал 2022 жылы мыстың жалпы өндіріс көлемі 380 мың тоннаны құрады. Ілеспе өнім ретінде 47 мың тонна концентраттағы мырыш, 171 мың унция алтын мен 3,8 млн унция күміс өндірілді.
Топтың негізгі өндірістік кәсіпорындары – Ақтоғай мен Бозшакөл саладағы алдыңғы қатарлы даму көрсеткіштерін қамтамасыз етіп, «KAZ Minerals» қорының басым бөлігі әлемдік деңгейдегі ашық түрдегі кеніштерден тұратын компанияға айналдырды. Сульфидті кенді қайта өңдеу қуатын екі есе арттыратын Ақтоғайды кеңейту жобасы 2021 жылдың қазан айында іске қосылып, желтоқсан айында тұтынушыларға алғашқы өнім жеткізілді. Жалпы, «KAZ Minerals» кәсіпорнында Қазақстанда, Қырғызстанда, Ресейде шамамен 14 000 адам жұмыс істейді.
Шығыс Қазақстан облысы
