Тілдер мерекесіне орай Ғылым және жоғары білім министрлігі Тіл саясаты комитеті, халықаралық «Қазақ тілі» қоғамы және Шайсұлтан Шаяхметов атындағы «Тіл-Қазына» ұлттық ғылыми-практикалық орталығы Алаш көсемі, аса көрнекті ғалым, ұлт тіл білімінің негізін қалаушы Ахмет Байтұрсынұлының туған күні аясында басқосу өткізді.
Мерекелік іс-шарада халықаралық «Қазақ тілі» қоғамы әзірлеген қазақ, орыс және ағылшын тілдеріндегі «Абай» кітабының тұсауы кесілді. Сонымен қатар Ахмет Байтұрсынұлының мұрасына арналған «baitursynuly.kz» сайты жиналған қауымға таныстырылды. Мерекелік басқосуда ұлт ұстазының, жалпы Алаш қайраткерлерінің шығармашылық мұрасы және мемлекеттік тілдің өзекті қыры, ғылым тілі, жаңа инновациялар т.б. мәселелер талқыланды.
Жиында қоғам қайраткері Оразкүл Асанғазы, Парламент депутаттары Нұртөре Жүсіп, Қазыбек Иса, Болат Керімбек, «Қазақ тілі» қоғамының президенті Рауан Кенжеханұлы, ҰҒА академиктері Дихан Қамзабекұлы, Шерубай Құрманбайұлы, Жазушылар одағы Астана филиалының директоры Дәулеткерей Кәпұлы ойларын ортаға салып, маңызды пікірлер айтты.
Басқосуға еліміздің жоғары оқу орындары оқытушылары, Республикалық терминология комиссиясының мүшелері, «Qyr balasy» қоғамдық қоры, Бас прокуратура, «Қазақтелеком» АҚ, «Қазпошта» АҚ, «KEGOK» АҚ, «Қазақстан темір жолы» АҚ өкілдері, мектеп мұғалімдері қатысты.
