Фото: Су ресурстары және ирригация министрлігі
Кездесуде Нұржан Нұржігітов шетелдік инвесторларға ынтымақтастық мүмкіндіктері мен жүзеге асыруға болатын жобаларды таныстырды. Атап айтқанда, Су саласын дамытудың 2024-2028 жылдарға арналған кешенді жоспарында көзделген су шаруашылығы нысандарын салу және реконструкциялау жөніндегі жұмыстар туралы айтып берді.
Министр су саласын, жерасты суларын автоматтандыру және цифрландыру, топтық су құбырларын қайта жаңғырту және маман даярлау саласында да бірлесе әрекет етуді ұсынды. Сонымен қатар, тараптар Қазақ су шаруашылығы ғылыми-зерттеу институтының, Су ресурстары ақпараттық-талдау орталығының және Ұлттық гидрогеологиялық қызметтің материалдық-техникалық базасын жақсарту мәселесін талқылады.
Шетелдік инвесторлар өз кезегінде министрліктің жобаларына қатысуға дайын екендіктерін білдіріп, талқылауды бірлескен жұмыс топтары шеңберінде жалғастыруға келісті.
«Біз Ислам даму банкімен келіссөздер хаттамасына қол қойдық. Осы арқылы Қазақстанның су саласына қомақты инвестиция әкелетін келісімдерді әзірлеу және оған қол қоюға мүмкіндік беретін келесі кезеңге өттік. Мемлекет басшысы еліміздің су саласына инвестиция тартудың маңызын атап өтті, сондықтан біз халықаралық қаржы институттарымен белсенді келіссөз жүргізіп жатырмыз», деді Су ресурстары және ирригация министрі Нұржан Нұржігітов.
