Суретті түсірген – Ақәділ РЫСМАХАН
Жергілікті атқарушы билік аудан орталықтарында тұратын халықты пәтермен қамтамасыз ету мақсатында да ауқымды жұмысты қолға алғанын айта кеткен жөн. Мәселен, біршама уақыт бұрын Тұрар Рысқұлов ауданының орталығы Құлан ауылындағы «Арай» шағын ауданында көппәтерлі тұрғын үй пайдалануға беріліп, кезекте тұрған азаматтар жаңа пәтердің кілтін алып, марқайып қалды.
Күні кеше Байзақ ауданының орталығы саналатын Сарыкемер ауылында 240 пәтерлі 4 көпқабатты тұрғын үй пайдалануға берілді. Жаңа пәтер иелерін қуанышымен құттықтай барған өңір басшысы Ербол Қарашөкеев кезекте тұрған тұрғындардың баспана мәселесін шешу негізгі міндеттердің бірі екенін атап өтті. Сондай-ақ ол бұл бағыттағы жұмыс алдағы уақытта да жалғасатынын тілге тиек етті.
«Дәл бүгін отбасымызбен бірге зор қуанышқа кенеліп отырмыз. Он жылға жетеғабыл уақыт бойы тұрғын үй кезегінде тұрдым (Алланың қалауымен). Бүгін үш бөлмелі пәтер кілтін алып, көңіл көкке ұшып, марқайып отырған жайымыз бар. Ауыл халқының мәселесін шешуге ықпал етіп отырған басшыларға айтар алғысымыз шексіз. Бұл – көпбалалы отбасылар үшін үлкен демеу», дейді сегіз баланы тәрбиелеп отырған ана Нағима Еділханқызы.
Облыс әкімдігінің баспасөз қызметі келтірген дерекке жүгінсек, әл-Фараби шағын ауданында бой көтерген 4 тұрғын үйде 1 бөлмелі – 80, 2 бөлмелі – 80, 3 бөлмелі 80 пәтер бар екен. Жергілікті атқарушы билік бірінші кезекте көпбалалы, толық емес отбасылардың, сондай-ақ ата-анасының қамқорлығынан тыс қалған балалардың және бюджеттік сала қызметкерлерінің өтінішін қанағаттандыру туралы шешім қабылдаған.
Жалпы алғанда, облыс орталығының іргесінде орналасқан Байзақ ауданында 3 мыңнан астам азамат тұрғын үй кезегінде тұр екен. Олардың мәселесін кезең-кезеңімен шешу мақсатында ауқымды жұмыс атқарылып жатыр.
Жергілікті жұртты баспанамен қамтамасыз ету үшін 2023 жылы 4 тұрғын үйдің құрылыс жұмысы қолға алынса, осы жылы 120 пәтер сатып алу көзделген. Бұдан бөлек, бірнеше жыл бұрын аудандарда басталған «Асарлатып үй салу» жобасы да тоқтамақ емес. Сол жоба аясында 15 азаматқа баспана салу бойынша жұмыс қарқын алған.
«Өңір халқын баспанамен қамтамасыз етудің маңызы орасан зор екені белгілі. Сол үшін де жергілікті атқарушы билік өкілдері тынымсыз еңбек етіп жүр. Қазіргі кезде құрылыс жұмысы жүргізіліп жатқан 2 909 пәтерлі 56 тұрғын үйдің 51-ін осы жылдың соңына дейін пайдалануға беруді жоспарлап отырмыз.
Жергілікті жастардың пәтерлі болуына да мүмкіндіктер қарастырылған. «Әулиеата жастары» бағдарламасы осы жылы да жалғасатынын айта кеткен жөн. Нақтырақ айтсақ, биыл 140 жас маман қоныстойын тойлайды. Өткен жылы да біраз жас тұрғын үймен қамтылған болатын.
Облыс бойынша тұрғын үй құрылысын жүргізуге, пәтер сатып алуға 40,8 млрд теңге қаражат қарастырылған. Бұл көрсеткіш өткен жылмен салыстырғанда екі есеге артып отыр.
Облыс орталығы Тараз қаласынан бөлек, Сарысу, Тұрар Рысқұлов, Шу аудандарында 5,9 млрд теңгеге 79 көппәтерлі тұрғын үйге күрделі жөндеу жұмысы жүргізіледі. Түсінгенге бұл аз жұмыс емес. Көпбалалы отбасылар мен халықтың әлеуметтік осал топтарын баспанамен қамту мақсатында облыс бойынша 23,5 млрд теңгеге 1 575 пәтер сатып алуды жоспарлап отырмыз», дейді өңір басшысы.
Расында да, кейінгі жылдары кезекте тұрған өңір халқын баспанамен қамту бағытында ауыз толтырып айтарлықтай жұмыстар атқарылып жатқаны көңіл қуантады. Байзақта болсын, қай жақта болсын, қолға алған бұл жұмыс ілкі сәтке де тоқтамақ емес.
Жамбыл облысы,
Байзақ ауданы
