Алматы қаласының Радиоэлектроника және байланыс әскери-инженерлік институты сержанттар мен запастағы офицерлерді даярлау мақсатында ақылы оқытуға азаматтық жоғары оқу орындарының студенттерін қабылдауды жалғастырады. Бағдарлама бойынша әскери кафедрасы жоқ жоғары оқу орындарының студенттері оқи алады. Радиоэлектроника және байланыс әскери-инженерлік институты бастығының бірінші орынбасары, полковник Ержан Қабышев оқыту түрлі әскери пәндер арқылы ауқымды дайындықты қамтитынын айтады.
– Студенттер радиациялық, химиялық және биологиялық қорғаныс, әскери топография, атыс және саптық дайындық, жалпы тактика сияқты жалпы әскери пәндерді оқиды. Таңдаған мамандыққа байланысты пәндер басты назарға алынды. Қабылдау үдерісі бірнеше кезеңнен тұрады. Үміткерлер медициналық комиссиядан, психологиялық тестілеуден, дене шынықтыру деңгейін тексеруден өтеді. Іріктеудің соңғы кезеңі – студенттердің оқу орындарындағы үлгерімінің орташа балын конкурстық талдау. Іріктеудің барлық кезеңі бақылау комиссиясының қатаң бақылауында өтеді, –дейді Е. Қабышев.
Институтта студенттердің теориялық білім алуына толықтай жағдай жасалған. Дәріс барысында инновациялық технологиялар қолданылып, практикалық сабақтар мен жауынгерлік даярлыққа айрықша мән беріледі. «Запастағы сержанттар», «запастағы офицерлер» бағдарламалары студенттерге әскери мамандық алуға ғана емес, сонымен қатар өздерінің кәсіби дағдыларын едәуір кеңейтуге ықпал етеді. Мұндай біліктілік оларға азаматтық және әскери салада жаңа мүмкіндіктерге жол ашпақ.
Запастағы сержант атағын алғысы келетін студенттерге оқу мерзімі – бір жыл, ал оның құны – 250 мың теңге. Запастағы офицер болуды жоспарлағандар 500 мың теңге төлеп екі жыл оқуы керек. Осы бағдарламалар бойынша екінші рет іріктеу өткізіліп отырғанын айта кеткен жөн. Өткен оқу жылында запастағы сержанттар бағдарламасы негізінде 62 адам білім алып, оларға «запастағы кіші сержант» атағы берілген.
Аталған оқу ошағы – радиотехника мамандықтары бойынша офицер-инженерлерді дайындайтын Орталық Азия аумағындағы тұңғыш әрі жалғыз жоғары білім ордасы. Жалпы алғанда, Радиоэлектроника және байланыс әскери инженерлік институты зенитті зымыран, радиотехникалық әскерлер, авиацияны радиотехникамен қамтамасыз ететін байланыс бөліміне білікті офицерлерді, сондай-ақ әскерлер мен қару-жарақты басқарудың автоматтандырылған жүйелерінің инженерлерін даярлайды. Офицерлер-радиоинженерлерді даярлау 5 мамандық негізінде жүргізіледі.
Әскери ЖОО заманауи оқу-материалдық базамен қамтамасыз етілген. Оқу аудиториялары мен зертханалары түрлі радиотехникалық стендтермен, компьютерлік және лингофонды техникалармен, симуляторлармен, сондай-ақ жаттығу кешендерімен жабдықталған. Курсанттар теориялық білімдерін институттың оқу орталығында жетілдіре түседі. Болашақ офицерлер шынайы жауынгерлік техникаларда тәжірибеден өтіп, радиолокациялық бекеттер мен байланыс әскери техникаларына қызмет көрсетеді.
Қолда бар мәліметтерге сүйенсек, қазіргі таңда еліміздегі 40-қа жуық жоғары оқу орнының базасында әскери кафедра бар. Бұл кафедраларда жылына 8 мыңнан аса запастағы офицер шыңдалып шықса, кейінгі 4 жылда 30 мыңнан аса студент лейтенант шенін алған.
АЛМАТЫ
