Жиында Президент архивінің директоры Әлия Мұстафина сөз алып, архивтің өткен тарихы мен бүгінгі ахуалы жөнінде атап өтті. Сондай-ақ ол Президент архивінің 30 жылдығына арналған мерейтойлық пошта маркасын шығару бұл өткенге құрмет және оны насихаттауға ұмтылыстың көрінісі екенін тілге тиек етті.
«Мерейтойлық пошта маркасын шығару архивтің «Ұлттық архив қоры және архивтер туралы» заңында бекітілген құжаттық мұраны қалыптастыруда рөл атқаратын стратегиялық ақпараттық ресурстардың бірі ретіндегі ерекше мәртебесін көрсетеді», деген Ә.Мұстафина пошта маркасын шығарған «Қазпошта» басшысы Әсел Жанасова мен ұжымына зор алғысын білдірді.
Мерейтойлық пошта маркасын шығару отандық архившілердің жұмысына деген үлкен ықыластың белгісі деуге болады. Өйткені отандық пошта маркасы алғаш рет архив саласына арналып отыр. Марка 1 қазаннан бастап айналымға шығады. Жалпы тиражы 5 мың дананы құрайды. Пошта маркаларындағы суреттер – маңызды тарихи оқиғалар мен жетістіктердің шежіресі. Арнайы мөртабанмен белгіленгеннен кейін коллекциялық құндылыққа ие болады, архивте сақталған тарихи, маңызды құжаттар сияқты есте қаларлық нысанға айналады. Президент архивіне арналған алғашқы мерейтойлық марка еліміздің даму тарихын зерттеушілер мен филателистердің топтамаларында лайықты орын алып, нағыз сирек кездесетін құндылыққа айналатыны сөзсіз.
АЛМАТЫ
