СІБІР ЖАРАСЫ АУЫЛДЫҚТАРДЫ ӘЛЕККЕ САЛУДА

Малдардың осы ауруға қарсы егілмегенін біле тұра, олардың жаппай қырыла бастағанынан секем алып, ауыл әкімдері дәрігерлерге дер кезінде хабарлауы керек еді. Жалпы, ауылдық аумақтар бойынша тұрғындарға бұл жайында хабарлап, сақтандыру шаралары атқарылмаған. Ақсу қаласы аумағына қарасты ауылдарда орын алған адам өліміне әкелген төтенше оқиға мал ұстап отырған облыстың басқа аудандарының ауыл әкімдерінің жұмыстарына сабақ болар деген ойдамыз. Адам өліміне алып келген мұн­­дай ауыр індет Ақсу қаласы Жол­құдық ауылдық аумағына қарасты Ревровка және Қаракөл ауылда­рында орын алды.Өкінішке қарай, жеке ауласында өзі сойған малдың сібір жарасы ауруын жұқтыр­ға­нынан мүлде хабарсыз ауыл тұр­ғыны осы індеттің кесірінен ауру­ханада көз жұмды. Одан кейін де осы ауылдың тағы да төрт тұрғыны өздерін жайсыз сезініп, ауыра бас­таған, қазір олар да ауруханада жатыр. Дәрігерлер оларды бақы­лауда ұстап отыр. Ауырған малды лақтыруға қимай, ауыл адамдарына таратып берген салақтық пен жауапсыздықтың аяғы, міне, осындай қайғылы жағдайларға алып келді. Соның кесірінен тағы 80-ге жуық адам дәрігерлердің бақылауына алынды. Тағы бір адам ауыр халде жатыр. Жалпы, осы ауылдық аумақта маусым айынан бері 5 мал өлген кө­рінеді. Алайда, малдардың өлге­нін жаппай улану деп қарап, мал дәрігерлеріне хабар берместен еті бір емес, екі бірдей ауыл адам­да­рына таратылып берілген. Мем­ле­кеттік санитарлық-эпидемио­ло­гиялық қадағалау комитетінің бастығы Қанат Сәкиев журналис­тер­мен өткізген баспасөз мәсли­хатында “Малдардың қандай ін­детке ұшырағанын мал дәрігер­лерінің өздері білмей отырса, қа­рапайым ауыл тұрғындарына не ай­туға болады. Полицейлер өлген мал­дарды тауып алды. Қазір олар­ды көміп, өртеу жұмыстары жүр­гізілуде”, – деді. Ауылдағы малдар­дың сібір жарасы ауруына қарсы егілмегені, егу жұмыстарына қажет­ті дәрі-дәрмектердің дер кезінде жеткізіл­мегені де анықталып отыр. Бұл ауылдарда малдар арасындағы сібір жарасы індеті сонау 1967 жылы тіркеліпті, мал мамандары бұл қоздырғыш індет топырақта 60 жыл өмір сүреді және сақталады дейді. Фарида БЫҚАЙ, ПАВЛОДАР.