Суретті түсірген – Жеңіс Ысқабай
Өңірді жаңа мектеппен қамту жұмысы қарқынды жүріп жатыр. Әсіресе ауылдарда ескі мектептер күрделі жөндеуден өтіп, жөндеуге келмейтін кейбір нысандардың орнына жаңа білім ордалары бой көтеруде. Өңір әкімінің баспасөз қызметінің мәліметінше, биыл облыста бес мектептің құрылысы жүрген. Бұған дейін осы оқу жылында Көксу ауданы Қаратал аулында 120 орындық мектеп іске қосылған болса, жыл соңына дейін Ақсу ауданына қарасты Көшкентал аулында 180 орындық жаңа мектеп ашылады. Ал қалған 2 мектеп, яғни Алакөл ауданы Достық аулындағы 600 орындық, Панфилов ауданы Талды аулындағы 300 орындық мектептер 2025 жылғы жаңа оқу жылында іске қосылады деп жоспарланған.
Жаркенттегі мектептің ашылу салтанатына облыс әкімінің орынбасары Диас Есдәулетов, ардагер ұстаздар, мектеп ұжымы, ата-аналар мен оқушылар, аудан жұртшылығы қатысты.
«Бұл – Президент тапсырмасымен «Жайлы мектеп» ұлттық жобасы аясында салынған облысымыздағы алғашқы білім ошағы. Панфилов ауданы – облыстағы оқушы саны көп өңірдің бірі. Жаңадан пайдалануға беріліп отырған бұл мектепке Жаркент қаласының бала саны көп 9 мектебінен 1100 жуық бала қабылданып отыр. Осындай замануи мектепте біліммен сусындайтын оқушылар облысымыздан топ жарып шығатынына сенімім зор. Мектеп ұстаздарына еліміздің болашақ білімді, еңбекқор патриоттарын тәрбиелеу жолында сәттілік тілеймін!», деді Д.Есдәулетов.
Мұнан соң мектептің лентасы қиылып, жиналған көпшілік жаңа ғимараттың ішін аралап көрді.
Жалпы, мектеп заманауи талапқа сай жабдықталған. Мұнда 64 кабинет болса, оның 6-ауы жаңа модификациялық кабинет, соның ішінде химия, физика, биология, роботтехника, Steam кабинеттері, нано технология т.б. бар. Барлық пән кабинеттері қажетті әдістемелік, техникалық құралдармен жабықталған. Сонымен қатар ағаш, металл, тігін және басқа да шеберханалар қарастырылған. Акт залы, 2 оқу залы бар кітапхана, 230 орынды асхана, 2 спорт залы, 1 би залы оқушылардың игілігіне қызмет етеді. Оған қоса оқушылардың оқу құралдарына, киімге арналған жеке шкафтар, сондай-ақ кітап оқуға, балалардың шығармашылық дамуы мен демалуына коворкинг аймақтар қарастырылған.
Жаңа да жайлы мектептің ашылғанына ата-аналар да қуанышты.
«Біздің Жаркент қаласына осындай жайлы мектеп салып бергендеріңіз үшін барша ата-ананың атынан алғыс айтамыз. Менің қызым қазір 11-сыныпта оқиды. Балалардың ҰБТ-ға, емтихандарға сапалы дайындалуына мұнда барлық мүмкіндік жасалған, оқу залдары бар кітапханасы, материалдық базасы мықты пән кабинеттері – бәрі де оқушылардың сапалы білім алуына өзінің үлкен ықпалын тигізеді деп ойлаймын», дейді ата-аналар комитетінің төрағасы Айдар Бектемірұлы.
Мектеп директорының міндетін атқарушы Айгүл Дарубаеваның айтуынша, қазіргі кезде мектепте 46 жиынтық класс ашылған. Жаркент қаласындағы бала саны көп тоғыз мектептен сыныптар жетекшілерімен бірге ауысып келген. Бүгінгі күні педагогтер үшін 30 бос орын, техникалық қызметкерлерге 20 орынға конкурс жарияланып, жұмысқа қабылдану үстінде.
«Мектептегі физика, химия, биология және роботтехника пәндері бойынша заманауи кабинеттерде touch-экрандар орнатылып, мектептің кез келген жерінен жылдамдығы жоғары интернетке қосылу мүмкіндігі беріледі. Ерекше білім алуды қажет ететін балаларға тиісті жағдайлар жасалған. Бастауыш және жоғары сынып оқушылары мектепте бөлек блоктарда оқиды. Ғимаратта балалар үшін бейнебақылау, дыбыстық хабарлау және басқа да күшейтілген қауіпсіздік шараларына арналған жабдықтар орнатылған», дейді А.Дарубаева.
Айта кетейік, бүгінде облыста мектепке дейінгі, орта, техникалық және кәсіптік білім беру саласында 21 мыңнан аса педагог жұмыс істейді. Соның ішінде ауылдарда 3600-ден аса жас маман қызмет етеді, оның 107-і – биылғы оқу жылында жұмысқа орналасқан жастар. Ауылдағы жас ұстаздарды баспанамен қамту мәселесі оң шешімін тауып келеді. «Дипломмен – ауылға!» бағдарламасы бойынша облыста 1600-ге жуық педагогке тұрғын үй сатып алуға пайызсыз несие берілсе, 2900-ден астам мұғалімге көтерме жәрдемақы төленді. Жайлы мектепке де жақсы маманның келері даусыз. Сол себепті өңірдегі кадр тапшылығын шешу үшін арнайы гранттар бөлініп жатыр.
«Әрине, маман тапшылығы республика көлемінде ауқымды мәселе. Біздің өңірде облыста тоқсаннан астам мұғалім жетіспейді. Әр жыл сайын жергілікті бюджеттен қаражат бөлініп, грант тағайындалып, оның 40 пайызын педагогикалық мамандықтарға бөліп отырмыз. Соған қарамастан, мамандар тапшылығы өзекті болып отыр. Оның басты себебі: осы салада оқыған әрбір бесінші түлек өз мамандығы бойынша жұмыс істемейді немесе тек облыс орталығында жұмыс істегісі келеді», дейді облыстық білім басқарамасының басшысы Марат Сүлейменов.
Келер жылы Жетісу жерінде тағы да ондаған мектептің құрылысы басталады.
