Суреттерді түсірген – Жұмабай Мұсабеков
Аталған форум саладағы инженерлердің, IT-сарапшылардың, әзірлеушілердің, сала көшбасшыларының басын бір шаңырақ астында біріктірді. Бұл шара аймақтағы цифрлық саланы дамытудың негізгі тақырыптарын талқылауға арналған жаңа алаңға айналды. Өңір әкімі баспасөз қызметінің мәліметінше, облыста көрсетілетін мемлекеттік қызметтердің 96%-ы автоматтандырылған, сондай-ақ елді мекендердің 95,2%-ында интернет жеткізілген. Бүгінде облыс орталығы Талдықорған қаласында 5G желісі үшін 13 базалық станса
орнатылған.
Салтанатты шараның ашылуында облыс әкімінің орынбасары Диас Есдәулетов кездесуге қатысушыларды құттықтап, игі тілегін жеткізді.
«Бүгінгі іс-шара заманауи шешімдерді енгізуді жеделдетуге және өңірде ыңғайлы әрі тиімді цифрлық инфрақұрылымды құруға көмектесетін әдістерді талқылау, цифрлық технологиялар саласындағы мамандар мен сарапшылардың күш-жігерін біріктіру мақсатында ұйымдастырылып отыр. Цифрлық трансформация дәуірінде мемлекеттік құрылымдардың алдында қызмет көрсетудің жеделдігін арттыру ғана емес, сонымен қатар азаматтармен өзара іс-қимылдың әр кезеңінде ашықтық пен есептілік қағидаттарын енгізу міндеті тұр. Жалпы алғанда, Жетісуда көрсетілетін 289 мемлекеттік қызмет пен қосалқы қызметтердің 277-сі немесе 96% автоматтандырылды. Қызмет іске қосылған сәттен бастап 1 370 өтінім келіп түсті», деді Д.Есдәулетов.
Сондай-ақ өңірде салаларды цифрландыру бойынша бірқатар жобалар табысты жұмыс істеп жатқаны да сөз болды. Атап айтқанда «Кілем жабыны» жобасы аясында полиция департаментінің жедел басқару орталығына 15 мыңнан астам бейнебақылау камерасы қосылған, сондай-ақ жол қауіпсіздігін күшейту үшін жол ережелерін бұзушыларды анықтауға және көлік легін өлшеуге мүмкіндік беретін 216 камера орнатылған.
Денсаулық сақтау саласын цифрландыру мақсатында өңірдің 16 медициналық мекемесінде рентген сәулелерін жоғары дәлдікпен талдауға мүмкіндік беретін PACS жүйесі енгізілді, бұл дәрігерлерге ерте диагноз қоюға көмектеседі, әсіресе онкологиялық ауруларды ерте анықтауда маңызы зор. Жүйе жұмыс істегеннен бері 615 мыңнан астам зерттеу жүргізілген.
Өңірдің білім беру саласын цифрландыру жұмыстары аясында Жетісу облысындағы 337 мектеп түгел интернетке қосылған. Оның ішінде осы жылы шалғайдағы 53 мектеп «Starlink» спутниктік жүйесі арқылы қосылды. Сондай-ақ 69 мектепте балалардың сабаққа қатысуын бақылайтын, тамақтануын есепке алатын, кітапханаларға кіруіне мүмкіндік беретін «Оқушының бірыңғай карточкасы» жүйесі енгізілді.
Жоғары білікті ІТ-мамандарды даярлау мәселесі де шешіліп отыр. Атап айтқанда, Талдықорғанда «Samsung Innovation Campus» бағдарламалау мектебі ашылып, «IT Hub Jetisu Digital» базасында курстар өткізілуде, онда мыңнан астам адам оқудан өтті.
Осы күні форум аясында «Әлеуметтік әмиян – мемлекеттік қолдау шараларын цифрландыру» тақырыбында пленарлық сессия ұйымдастырылды.
Спикерлердің бірі облыстық жұмыспен қамтуды үйлестіру және әлеуметтік бағдарламалар басқармасының басшысы Ермек Мизамбаев «Әлеуметтік әмиян» пилоттық жобасының мәніне егжей-тегжейлі тоқтала келе, жоба халықтың әлеуметтік осал топтарының қаржылық құралдарға қолжетімділігін қамтамасыз ету, әлеуметтік көмекті есептеу рәсімін жеңілдету, әлеуметтік қолдау құралдарын жетілдіру, сондай-ақ бюджет қаражатының шығыстарын оңтайландыру үшін құрылғанын айтты.
Сол сияқты облыстық білім басқармасының басшысы Марат Сүлейменов, облыстық цифрлық технологиялар басқармасының басшысы Айдын Темірбаев та сөз алып, цифрландыру бағытындағы жұмыстарға тоқталды.
Форум негізгі тақырыбынан бөлек жасанды интеллект, деректерді талдау, киберқауіпсіздік, әлеуметтік қызметтерді цифрландыру, сондай-ақ көлік және қауіпсіздік сияқты маңызды бағыттарды да қамтыды.
Сондай-ақ «Google Developer» сарапшысы Энес Тұран, «MSP Global» техникалық директоры Руслан Жансеңгіров IT-индустриядағы жаһандық трендтер мен өзгерістер, бизнес-үдерістердің тиімділігін жақсартудағы жасанды интеллектінің рөлі, киберқауіпсіздік саласындағы соңғы шешімдер мен технологиялар жайлы баяндады. Мемлекеттік қызметтердің қолжетімділігін арттыру, азаматтарды цифрлық қолдау мәселелері талқыланды. Сонымен қатар қоғамдық қауіпсіздікті арттыруға және қалалық қызметтерді қолдауға бағытталған «Қауіпсіз қала» жүйесі таныстырылды.
Жиында пікірталас алаңдарымен қатар IT-компаниялардың, цифрландыру жөніндегі сарапшылардың цифрлық жобаларын ұсынатын «Jetisu IT Expo» көрмесі ұйымдастырылды. Оған телекоммуникация, деректерді талдау, қауіпсіздікті қамтамасыз ету, геокарталарды әзірлеу және т.б. салаларда жұмыс істейтін еліміздің әртүрлі қалалары мен аймақтарынан келген 12 отандық компания қатысты.
Мәселен, Шығыс Қазақстан облысынан келген «Rating» ЖШС компаниясының менеджер-талдаушысы Анастасия Хохлова қыркүйек айынан бері компания Жетісу облысының цифрлық технологиялар басқармасымен бірлесіп, түрлі бағытта ауқымды талдамалық деректер базасының ахуалдық орталығын құру жұмыстарын атқарып жатқанын айтты.
«Мысалы, аймақтың ерекше қажеттіліктері бар тұрғындары туралы ақпараттар кейсі жасалды. Ахуалдық орталықтың дерекқорында олардың саны қанша, олардың қаншасы мемлекеттік әлеуметтік көмек алғаны, қаншасы көмекпен қамтылмағаны және т.б. анық көрсетілген. Барлығы 12 кейс, соның ішінде «Жол апаттарын талдау», «Мектептердің толымдылығы», «Демография», «Еңбек нарығындағы жағдай» және т.б. әзірленді. Жыл соңына дейін кейстер саны 58-ге жетеді. Мұның бәрі аймақтың дамуы туралы барлық ақпаратты бір жерге жинақтауға, оны талдауға және жағдайды жақсарту шараларын қабылдауға мүмкіндік береді», деді А.Хохлова.
Ал Талдықорған қаласындағы Назарбаев зияткерлік мектебінің оқушылары көрмеде өздерінің марста жүретін роботын ұсынды, олар 9-сыныптан бастап осы жобамен жұмыс істеп, Астана мен Алматыда роботтехника халықаралық көрмелерінде көзге түскен.
«Біз барлық бөлшекті 3D-принтерде басып шығардық. Бағдарлама «Python» бағдарламалау тілінде жазылған. Біздің марста жүретін роботымыз Ай мен Марстағы үңгірлерді зерттеуге арналған. Бұл жобада сыныптасым Едіге Болатбекұлы екеуіміз бірге жұмыс істедік», дейді Талдықорған қаласындағы НЗМ 12-сынып оқушысы Қасым Әли.
Осы күні форум аясында цифрландыру саласындағы жетістіктері үшін өңірдің ІТ-мамандары марапатталды. Атап айтсақ, «Цифрлық технологияларды ілгерілетуші» номинациясы «Future-IT» роботехника мектебінің негізін қалаушы директоры Дамир Нұркежанов жеңімпаз атанса, «Жылдың цифрлық жеткізушісі» аталымында Қаратал орта мектебінің информатика пәнінің мұғалімі Кирилл Михов, ал «Стартап-мәдениеттің үздік тәлімгері» номинациясы бойынша Талдықорған жоғары политехникалық колледжінің бизнес – стартаб жобаларының жетекшісі Әсел Құлынтаева жеңімпаз болды. Сондай-ақ «Jetisu Digital» IT-хабының және «Astana Hub» IT-стартабы халықаралық технопаркінің ұжымы және басқалардың еңбегі атап өтілді. Оларға облыс әкімінің алғыс хаттары, арнайы мүсіншелер мен ақшалай сертификаттар берілді.
«Бүгінде цифрландыру біздің өміріміздің барлық саласына тән әрі жетісулықтар үшін қызметтердің қолжетімділігі мен сапасын арттыруда маңызды рөл атқарады. Біздің мақсатымыз – өңірдің әрбір тұрғыны білім беруде, денсаулық сақтауда, қалалық шаруашылықты басқаруда немесе мемлекеттік қызметтерді алуда заманауи технологияларды толық пайдалана алатындай ету. «Digital Jetisu Forum»-да ұсынылған жобалар цифрландырудағы жетістіктердің бір бөлігі ғана. Біз жаңа жобаларды әзірлеп, енгізуді жалғастырамыз, өйткені біздің басты міндетіміз – Жетісуды цифрлық технологиялар әр азаматтың игілігі үшін жұмыс істейтін өңірге айналдыру. Сондай-ақ біз өңірдің талантты жастары өз әлеуетін танытып, жобаларын іске асыра алатын цифрлық ортаны қалыптастыруға тырысамыз», деді А.Темірбаев.
Форум соңында «Jetisu Idea Battle» идеялар байқауының қорытындысы шығарылып, оның аясында өңірдің дәстүрлі үздік стартаперлері өз жобаларын дамытуға берілетін бағалы сыйлықтармен марапатталды.
Жетісу облысы
