Фото: instagram.com/maulen_ashimbayev
Айта кетейік, бүгін «Талдау мектебі» жобасының төртінші кезеңіне өтінімдер қабылдау басталды.
Мәулен Әшімбаев Мемлекет басшысы Қасым-Жомарт Кемелұлы Тоқаев еліміздің орнықты дамуы жолында талдау тәсілдері маңызды рөл атқаратынын үнемі айтып келетінін еске салды.
«Осыған байланысты біз әріптестерімізбен бірлесіп, бірнеше жыл бойы жас мамандардың аналитикалық қабілеттерін дамытуға атсалысып келеміз. Бүгінге дейін жоба аясында мемлекеттік қызмет, ұлттық компаниялар, білім беру және ғылыми мекемелерде, сондай-ақ, өзге де салаларда еңбек ететін 200-ге жуық жас маман біліктілігін шыңдады», деп жазды Сенат Төрағасы.
«Талдау мектебінің» төртінші кезеңі 2025 жылдың 11 қаңтары мен 1 наурызы аралығында ұйымдастырылады. Дәрістер дәстүрлі түрде әр сенбі сайын өтіп отырады.
«Төртінші кезеңнің тақырыбы – «Мәліметтерге негізделген шешімдер қабылдау (Data-Driven Decision Making) процесіндегі талдау және цифрлық тетіктер». Қатысушылар сегіз апталық курстар аясында осы бағыттағы қолданбалы әдіс-тәсілдерді меңгереді. Мектеп қатысушыларына белгілі қазақстандық және шетелдік сарапшылар дәріс оқып, ментор ретінде бағыт-бағдар көрсетеді», делінген жазбада.
Жоба және байқау шарттары туралы толығырақ ақпаратпен Парламент Сенатының сайтында https://senate.parlam.kz/ru-RU/taldau/2025/apply, сондай-ақ, Талдау мектебі - Школа аналитики мен Сенат жанындағы Сарапшылар Клубының әлеуметтік желілердегі парақшаларында танысуға болады.
