ТАҒЫЛЫМЫ МОЛ СЕМИНАР

Бурабайдың әсем табиғатының аясында орналасқан “Байбура” қонақ үй кешенінде бұқаралық ақпарат құралдары үшін  астаналық журналистердің “ТАНАТ” клубы мен “MEDІALІFE” қоғамдық қоры “БАҚ-тарда демократиялық үдерістерді жария етудің халықаралық және ұлттық тәжірибесі” атты республикалық семинар-тренинг ұйымдастырды. Журналистер күні қарсаңында әрі “Қазақстан – 2010 жылы ЕҚЫҰ төрағасы” байқауы шең­беріндегі шараның өтуіне Сыртқы істер министрлігі, ЕҚЫҰ-ның Астанадағы орталығы және Ф.Эберт қоры өкілдігі мұрындық болды. “MEDІALІFE” қоғамдық қорының президенті Ольга Вол­кова, Сыртқы істер министрлігінің Халықаралық ақпарат комитетінің төр­ағасы Роман Василенко, ЕҚЫҰ-ның Астанадағы орталы­ғы­ның басшысы, елші Александр Кельчевский, Литва елшілігінің Астанадағы бөлімінің бастығы Антанас Пятраускас және басқалар бірқатар құнды ойларын ортаға салды. Сондай-ақ семинар-тренинг барысында сөз бостандығының өл­шемі, факт мен пікірдің арасалмағы қаншалықты деген тұрғыда пікір­та­ластар болып өтті. Мысалы, “Жа­райсың, айлакер!”, “Қырағы көз мырза” және сол сияқты сөздердің адамның ар-намысын қорлауға немесе сипатын беруге бағыттал­ған­ды­ғы зерделенді. Ол үшін арнайы түсірілген бейнефильм де көрсетілді. Журналист аты-жөнін өзгертіп мақала жаза ала ма немесе өзінің дерек көзін ашып көрсетуге міндетті ме деген тұрғыда да ой өрбітілді. Осы ретте Ольга Волкова “егер айыптаушы миллиондаған сомаға арыз-талап жазса, онда ол сол сұрағанының белгілі бір пайызын бюджетке төлеуі тиіс” деген ой айт­ты. Сонда ғана арыз иесі сот про­цесінде жеңілген жағдайда құйған қаржысынан айрылады. Келесіде сотқа берген кезінде ойлана бастайды. Ал қазіргі жағдайда 600 теңге төлеп, миллиондаған теңгелік арыз-талап жазушылар қатары азаймай отыр. Осылайша екі күнге созылған тағылымы мол семинар-тренинг отандық бұқаралық ақпарат құрал­дары өкілдерін тағы бір сатыға көтерді. Журналистиканың қыр-сырын меңгере түскен оларға арнайы сертификат табыс етілді. Асқар ТҰРАПБАЙҰЛЫ.