ЕЛБАСЫНЫҢ ЖЕТПІС ҚҰРДАСЫ КЕМЕЛДЕНГЕН ЕЛ МЕН ЖЕР ЖАЙЛЫ СЫР ШЕРТТІ

“Алдыңғы толқын ағалар, кей­інгі толқын інілер” демекші, аға ұрпаққа деген құрмет пен ізет ата-бабалардан қалған ұлағат, туған халқымыздың бойына сіңген асыл қасиет. Ал енді әр кезеңнің, әр за­манның өз үні, өз талабы бо­ла­тын­дығы да айдай ақиқат. Мемлекет басшысының “Менің тағдырым сол кездегі менімен замандас туған балалардың тағдырынан ешқандай айырмашылығы жоқ деп санай­мын” деп атап айтуының да мәні бар. Ұлы Отан соғысы басталардан тура бір жыл бұрын жарық дүниеге келген, соңынан ел басына түскен ауыр жылдарды бастан кешкен ұрпақ өкілдері шын мәнісінде де ерте есейді. Туған елге, туған жерге деген сүйіспеншілік сезімі оларды биік мақсаттарға жетеледі. Қасиетті Отанның кемелденуіне, ел игілігін арттыруға деген ұмтылыс оларды туған халқына адал қызмет етуге үйретті. Соның нәтижесінде олар өз еңбегінің жемісін көріп, кейінгі жастармен өмірлік тәжірибесімен бөлісіп, үлгі-өнеге көрсете білді. Алматыда өткен “Елбасының жетпіс құрдасы” атты мәдени-та­нымдық кеште сөз алғандар міне, осы мәселелер төңірегінде сөз қоз­ғады. Басқосуға Мемлекет бас­шы­сы Нұрсұлтан Назарбаевтың бір мек­тепте бірге оқыған достары, замандастары, яғни биылғы жылы жетпістің шыңына шығып отырған еңбек ардагерлері, қадірлі қарттар қатысты. Олар ата-баба армандаған тәуелсіздікке қол жеткізген елі­міз­дің бүгінгі және кемел келешегі туралы ой бөлісті. “Нұр Отан” ХДП Алматы қаласындағы Медеу аудандық филиалы, “Жас Отан” жастар қанаты, “Ақ орда” респуб­ли­калық қозғалысының ұйымдас­ты­руымен өткізілген кештің мақ­са­ты – ұрпақтар арасындағы са­бақ­тастықты одан әрі жетілдіру, “кең-байтақ Қазақстандағы ынтымақ­тас­тық пен бірлік және бақытты өмір үшін және сол бағыттағы қажырлы еңбегі үшін Елбасына жас ұрпақ ал­ғысын жеткізу”, дейді “Нұр Отан” ХДП Медеу аудандық фи­лиалы төрағасының орынбасары Алмасбек Нұғыманов. Сонау тым алыста қалған ба­ла­лық балдәуренді бірге өткізген Сә­дуақас Есімбай, Едіге Исатайұлы жә­не олардың ұстаздары да өз ау­ыл­дарының ғана емес, ел мақ­та­нышына айналып, әлем таныған қай­раткер туралы жүректен шық­қан жылы лебіздерін білдірді. Нұр­сұлтан Әбішұлының бір мектепте он жыл бірге оқыған сыныптас досы Сәдуақас Есімбай құрдасы­ның балалық шағы туралы “Үш­қо­ңыр – алтын бесігім” атты кітабын жарыққа шығарғанына қуанышты. Сонау бір кездерді мектеп табал­дырығын бірге аттаған досының бүгінде әлем таныған қайраткер атанып, туған халқының игілігін арттыруға сүбелі үлес қосып отырғандығын ол атап айтады. – Нұрсұлтанның әкесі – Әбіш­тің отбасы әдеттегідей қарапайым тұрмысты, таусылмайтын тіршілік жұмысымен қоса, балаларына тә­лімді тәрбие беріп өсірген отба­сының бірі еді. Сөз реті келгенде атап айтарлығы, үлкен ұлы Нұр­сұлтанды әкесі жас кезінен еңбекке баулып, оны ұқыптылыққа, төзім­ді­лікке тәрбиеледі. Нұрсұлтан сон­дықтан да қаршадайынан малды қалай күтуді үйреніп, ең бастысы нанның қадір-қасиетін сезініп өсті. Көкірегі ояу, көзі көреген ақсақал ұлының бойында табиғат дарытқан талантын сезініп, аңғарды, – дейді Сәдуақас Есімбай өткен күндерге көз жүгіртіп. “Елбасының жетпіс құрдасы” атты мәдени-танымдық кешке қатысушылар сонымен қатар Елбасының ұстаздары – Сейітхан Исаев, Үсенбай Тастанбеков, “Ал­тын алқа” иегері, батыр ана Тұр­сынхан Сыдықбекова, белгілі өнер қайраткерлері Ескендір Хасан­ға­лиев, Алтынбек Қоразбаевтың және басқалардың да пікірлерін үл­кен ынтамен тыңдады. Көп балалы ана, белгілі ұстаз Мәрзия Тұр­лы­ханова: “Мемлекет басшысымен бір ауылда тумасақ та, заманымыз бір, бір жылдың төліміз. Мемле­кет­тік “Болашақ” бағдарламасы үшін, жас ұрпаққа арналған үлкен қам­қор­лығы үшін Елбасына айтар алғы­сымыз мол”, дейді. Сонымен, еңбек ардагерлері тұжырымының түйіні кең-байтақ еліміздегі тату-тәтті тіршілік пен ынтымақ Мем­ле­кет басшысының сарабдал сая­са­тының нәтижесі екендігі сөзсіз. Бақыт БАЛҒАРИНА, АЛМАТЫ.