«Бұл кітапты жазуда әр қазақ отбасының босағасы кең, шаңырағы биік болсын деген ниетті мақсат тұттым. Кезінде бір жас келіншек менің жас отбасыға айтқан ақыл-кеңесімді тыңдап ажырасу райынан қайтқанын айтты. Осындай шынайы оқиғалар да «Отбасы берекесі» кітабын жазуыма түрткі болды. Отбасында ер мен әйелдің орны бала үшін маңызды. Ұлттық құндылық насихатталатын, отбасылық ортадағы рухани бірлікті арттыруға ықпал ететін туынды оқырманға ұнайды деп үміттенемін», деді Оразкүл Асанғазы. Қоғам қайраткері бұл жинағында өмір тәжірибесіне сүйеніп, отбасындағы тәрбиенің маңызына, ата-ана мен ұрпақ арасындағы сабақтастық пен отбасылық берекені сақтау мәселелеріне жан-жақты тоқталады. Тағылымды жинақ үш тарауға бөлінген, әр тарауда отбасы құндылықтарына, ұрпақ тәрбиесінің өзектілігіне баса мән беріледі.
Жиында белгілі ғалым, дипломат Әділ Ахметов «Отбасы берекесі» кітабы болашаққа жаңадан қадам басқан жас отбасылар үшін таптырмас дүние екенін айтты.
«Бұл кітапты әуелі жастар оқуы керек. Жақсы мақсатқа ұмтылып жүрген жастарға көбірек қажет. Автордың өзі – жастарға үлгі. Жастарға арналған кітап болғандықтан, ене мен келіннің орны, балаға қандай ана болуы керек дегендей түрлі кеңес айтылады. Бір деммен оқылатын кітап. Кітапты жазу кезінде автордың ізденісі байқалады, отандық ғалымдардың еңбегіне үңілген. Тебіренбей оқымау мүмкін емес», деді Ә.Ахметов.
Алқалы жиынға келген зиялы қауым өкілдері кітаптың қоғамдағы маңызына үңіліп, ойларын ортаға салды. Іс-шара соңында Еркеғали Рахмадиев атындағы Мемлекеттік академиялық филармонияның Қазақ оркестрі ұжымының дирижері Нұрлан Бекеновтің орындауында күй ойналып, өнерден шашу шашылды.
