ЕЛ АБЫРОЙЫН АСҚАҚТАТҚАН

Әлем мә­де­­ниеті күн­нен күнге да­мып келеді. Және бұл үрдіс­ке зор ықпалын тигізетін жастар қауымы. Бүгінде бұған дәлел көп. Солардың бірі – жуырда (26 маусым – 2 шілде ара­лығында) Армения ас­танасы Ере­ван­да өткен ТМД елдері жастары арасындағы VІ Дельфий­лік ойын­дар. Биылғы шара 1941-1945 жыл­дардағы Ұлы Отан соғы­сын­дағы Жеңістің 65 жылдығына арналды. Әлемде ең алғаш рет дельфий­лік ойындар біздің дәуірімізге дейін 582 жылы Грекияда басталған көрінеді. Аполлон негізін қалаған бұл сайыс Пифийлік ойындар деп аталған екен. Содан кейін ғана Дельфи қаласында өткізілгендіктен, қазіргі атауына ие болыпты. Негізінен дельфийлік ойындар үш мәрте жаңғырған. Алғаш Гре­кияда бастау алса, Олимпия ойын­дары­мен бірге 1600 жыл бұрын тоқ­татылған екен. Содан тек 1927-1930 жылдарда гректер қайта жан­дан­дыр­ған болатын. Бірақ ІІ дүние­жүзі­лік соғыс бұған да өз кедергісін тигіз­ген-ді. Бүкіл адамзат қолдай­тын өнер байқауы 2000 жылы қайта жандану кезеңіне аяқ басып, Мәс­кеуде 27 ел­дің қатысуымен Халық­ара­­лық дель­фийлік ойындар өткізілген еді. Ал бүгінгі таңда осы мәдени шара­ның зор дамығаны айдан анық. Ереванда өткен ойындар ТМД елдерін мәдениет және өнер сал­асында жақындастырып қана қоймай, еларалық байланыстарды нығайтуға жол ашты. Алдын ала еліміздегі барлық қалаларда өнерлі жастар арасында сайыс өткізіліп, мықтылары осы халықаралық додада Қазақстан намысын қорғау­ға мүмкіндік алған еді. Еліміздің атын шығарып, өз өнерлерін паш еткен жас таланттарымыз ел сені­мін толығымен ақтады десек, қате­леспейтініміз анық. ТМД елдеріндегі жастар қауы­мын біріктіретін, бірнеше ұлттар арасындағы татулық көпірі болған бұл дәстүрлі сайыста Қазақстан құрамасы жоғары белестен көрінді. 19 номинацияда жарысқа түскен біздің жастар олардың 8 түрінен үздік нәтижелер көрсете алды. Айта­лық, цирк номинациясында өнер көрсеткен Дана Рысбекова мен Дария Абдулахасова алтын медальға ие болды. Сонымен қатар Бексана Оңдағанова ұлттық ән айту өнерінде үздік шығып, алтыннан алқа тақты. Ал Мәдина Адамова (“Скрипка”) мен Альфия Валитова (“Форте­пиано”) күміс жүлдеге қол жеткізсе, Сабыржан Жүнісбеков (“Ди-джей”) және “Жорға” ұлттық би ансамблі үшінші орыннан көрінді. Басқа да өнерлі жастары­мыз әр түрлі номи­нацияларда дипломдарға ие болды. Міне, “Өнер – жас ұланнан, жүй­­рік – тай-құнаннан” демекші, жастарымыздың осындай халық­аралық дәрежедегі абыройлы жетістік­тері – елдің де үлкен мақтанышы. Би-Болат СЕЙТАҚ, Еуразия ұлттық университетінің студенті.