Сурет: Айгерім Бегімбет
Сұхбатты мұқият зерделей отырып, онда қысқа мерзімді науқандардың емес, ұзақ жылдар бойы жүргізілген жүйелі реформалар мен терең аналитикалық талдау нәтижесінің жатқаны аңғарылады. Мемлекет басшысы ұсынған «Әділетті Қазақстан» концепциясы – жай ғана ұран емес, қоғамның әрбір саласын қамтитын ауқымды трансформация. Алайда мұндай терең өзгерістерді жүзеге асыру үшін тек саяси ерік жеткіліксіз, трансформациялық көшбасшылық қажет.
Трансформация дегеніміз – үйреншікті ескі жолдан бас тартып, бұрын ешкім жүріп өтпеген жаңа соқпаққа түсу. Бұл – мәселені жасырмай, шынайы ахуалды ашық айту және ел болашағы үшін табандылық таныту. Мемлекет басшысының сұхбатынан біз дәл осындай жауапкершілікті сезіндік.
Мен облыстық мәслихат депутаты ретінде өңірлерді аралағанда халықтың мұң-мұқтажын жиі тыңдаймын. Тәуелсіздіктің отыз жылында қордаланған инфрақұрылымдық мәселелердің бүгінде кезең-кезеңімен шешіліп жатқанына куәмін. Президент ықпалды топтардың арзан ұрандармен жеңіл жетістікке жету әрекеттерін сынға алды. Шын мәнінде, нақты жұмыс ұзақмерзімді қажырлы еңбекті талап етеді.
Мұндай жағдайды біз өз университетіміздің мысалында да көрдік. Қызметке келген кезімізде оқу орнының материалдық базасы мен инфрақұрылымы әбден тозған еді. Кейінгі бес жылда жүргізілген жүйелі жұмыстың нәтижесінде 15 ғимараттың шатыры жаңартылып, қазандықтар ауыстырылды, ботаникалық баққа тас жол төселіп, қалашық аумағындағы асфальт жаңартылды. Бұл өзгерістер елдегі жаңа саяси ұстанымның, мемлекеттік мекемелер тарапынан көрсетілген шынайы қолдаудың арқасында жүзеге асты. Халықпен кездесулерде «бәрібір орындалмайды» деген күмәнмен қараған азаматтардың бүгінде нақты нәтижені көріп, сенімі оянғанын көру – біз үшін үлкен мәртебе.
Президент 2026 жылды «Цифрландыру және жасанды интеллект жылы» деп жариялауы тегін емес. Бұл – заманауи технологиялар арқылы экономикалық трансформацияны жеделдетудің төте жолы. Ясауи университеті де бұл бағытта қалыс қалмай, жасанды интеллект саласында іргелі жобаларды бастап кетті. Өңірдегі мекемелермен жасалған меморандумдар ғылыми зерттеулердің практикалық қолданысқа ие болуына мүмкіндік беріп жатыр.
Қорыта айтқанда, бұл сұхбат бізге тек ақпарат беріп қоймай, үлкен сенім мен жігер сыйлады. Әділетті жүйе құру жолындағы реформалар сабыр мен қоғамдық қолдауды қажет етеді. Егер бұл жол жеңіл болса, оны әлдекімдер әлдеқашан жүріп өтер еді. Қазіргі міндет – күнделікті ақпараттық шуға ермей, елдің стратегиялық мақсаттарына жұмылу. Өткеннің қателігінен сабақ ала отырып, болашаққа нық қадам басу – Әділетті Қазақстанның басты бағдары болмақ.
Жанар ТЕМІРБЕКОВА,
Қожа Ахмет Ясауи атындағы Халықаралық қазақ-түрік университетінің ректоры
