Рухы берік ел ертеңіне сенімді

Бүгінде бүкіл еліміз секілді Алматы облысы да индустрияландыру бесжылдығының алғашқы жылын қарқынды бастап, негізгі көрсеткіштер бойынша алдыңғы қатардан көрініп келеді. Тіпті Қазақстан ғана емес, басқа кемелденген мемлекеттердің өзіне зіл батпан салмақ боларлық Қызылағаш қасіреті де облыстың алғашқы даму қарқынын бәсеңдете алған жоқ. Ең алдымен Елбасы Нұрсұлтан Назарбаевтың тікелей қамқорлығы арқасында, мемлекеттің және барша қазақстандықтардың нақты көмегі негізінде сойқан су тасқынының салдарынан тып-типыл болған ауыл бүгінде жаңадан салынды. Қандай да болсын қиындықтарды жеңуге, көп болып жұмыла кіріссе биік межелерге жетуге болатындығын Алматы облысының ұйымшыл жұртшылығы іскерліктерімен, ізденістерімен, татулығымен, бірлігімен дәлелдеп отыр. Мұндайда басты да шешуші фактор ретінде рух беріктігін айтқан жөн болар. Елбасы сапарының бірінші күнгі бағытына назар аударсаңыз, сол рухты қайрай түсу, сөйтіп, берекелі бүгінімізді ертеңгі сенімділікке жалғау деген мақсатты аңдағандайсыз. Қазақстан Республикасының Пре­зи­денті – Қарулы Күштердің Жоғарғы Бас қолбасшысы Нұрсұлтан Әбішұлы На­зарбаев өңірдегі жұмыс сапарын Талды­қор­ған әскери гарнизонының құрамалары мен бөлімдерінде болудан бастады. Авиа­ция базасының әуежайында Нұрсұлтан Әбішұлы құраманың авиациялық техни­ка­сымен, оның жауынгерлік мүмкіндік­тері­мен танысты. Қазақстан әскерінің әуе шабуылынан қорғаныс күштерінің ұш­қыш­тары ірі ауқымды халықаралық жат­тығуларға әлденеше рет қатысқан. Қазір олар Қазақстан Республикасы Консти­туциясының он бес жылдығына арналған әскери парадқа әзірленуде. Әскери техникалармен танысып, ұшқыштармен кездесу барысына Қорғаныс министрі Әділбек Жақсыбеков түсінік беріп жүрді. Жоғарғы Бас қолбасшы мерзімдік және келісім-шарт бойынша қызметтегі әске­ри­лер парашютпен секіруге әзірленіп жатқан әуе десанты кешенінде болды. Қарулы Күштердің Аэроұтқыр әскеріне тиесілі бұл бөлім ТМД-дағы ең үздік­тер­дің бірі болып табылады және ҰҚШҰ-ның Ұжымдық жедел әрекет күштерінің құрамына кіреді. Берік рух пен темірдей тәртіптің әскерлері еліміздің бейбіт өмірін қырағы күзетеді. Елбасы сондай-ақ әскери қызметшілер тұратын Талдықорған коттедж қалашы­ғында болды. Адамның рухты болуы оның бойына бала жасынан дарытылған білім мен тәрбиеге байланысты болса керек. Мем­лекет басшысы және облыс әкімі Серік Үмбетов пен Президент Әкімшілігінің Басшысы Аслан Мусин бастаған ресми адамдар қаланың шығысында бой көте­ріп, жаңа оқу жылында шәкірттерге есігін айқара ашатын көп қабатты “Назарбаев зият­кер­лік мектебіне” келгенде ертеңгі күн­нің ие­лерін өзіміз тәрбиелеуге тиіспіз дейтін ұранның қалай іске асып жат­қа­ны­на куә бол­дық. Мектеп ауласында Мем­лекет бас­шысын бүлдіршіндер қуанышпен қарсы алды. Жаңа оқу жылында арнайы іріктеуден өткен 600 оқушы жаңа мектептің табал­дырығын аттауға дайын. Мектеп дирек­то­ры Гүлайым Байжикенова мұнда мате­матика мен физика пәндері тереңдетіліп оқытылатынын жеткізді. Зияткерлік мектеп құрылысына бюд­жет­тен 2,5 млрд. теңге жұмсалып, білім ордасы оқуға қажеттіліктермен толықты­рыл­са, интерактивті құралдармен жаб­дық­талған 59 пән кабинеттері, техникалық құралдармен толықтырылған 816 орынды мәжіліс жайы, конференц зал, электрон­ды абонемент орнатылған кітапхана, зияткерлік тетіктерді үлгілеу мүмкіндігі бар роботтық техника зертханасы, шәкірт­терді ғарыштық, медицина және басқа саладағы ғылыми-зерттеу жұмысына тар­ту­ға мүмкіндік беретін нанотехнология зертханасы, педагогтік ақпараттық техно­ло­гияларды ықпалдастыру орталығы, дә­рістік сабақтар аудиториясы шәкірттердің сапалы білім алуына деген барлық талап­тарға жауап беретіндігін Елбасы жақсы бағалады. Шәкірттердің саламатты өмір салтын қалыптастыруына бағытталған екі бассейн, осыншама асхана, спорт залы мен шынығу алаңы, тағы басқа орындар көз тартады. Мектеп жанындағы 90 орынға лайық­талған балабақша үш бағытты тіл мәселесі бойынша 3-6 жас аралығындағы бүлдір­шіндердің тіл сындыруына мүмкіндік туғызбақшы. Қаратал шағын ауданындағы әсем ғимаратта ел ертеңі үшін қызмет ететін ұс­таздардың білімді, білікті жеткіншек дайындауына толық жағдай бар. Аталған мектепте 7-сыныптан бастап шәкірттер Президент грантымен оқытылмақшы. Биылғы оқу жылында 240 баланың грант­қа ие болу мүмкіндігі бар екен. Елімізді жаңа биікке бастайтын стратегиялық мақ­сатты жүзеге асыратын тәжірибелі ұстаз­дар арнайы іріктеуден өткен, маманды­ғы­ның қыры мен сырын меңгергендер қатарынан жасақталғанының өзі алдағы мақсатты жұмыстың дәлелі деуге болады. Нұрсұлтан Әбішұлы зияткерлік мек­теп­тердің өмірімізге лайықты жан-жақты жетілген ұрпақ тәрбиелеудегі маңызды­лы­ғы мен оқу үрдісін әлемдік деңгейде оқыту мүмкіндіктері қарастырылған мектептегі ресейлік ғалым Олег Игорович Мухиннің жаңа электронды оқу бағдар­ламасын көрді. Бағдарлама әр баланың бойындағы қабілетін ашатыны және ата-ана мен ұстаздар арасында электронды байланыс орнатылатыны тамашаланды. Шаһардың шығыс жағындағы қаз-қатар орналасқан әсем ғимараттар “Қара­тал” шағын ауданын сәулеттендіре түскен. Олар бүгінде ел игілігі үшін қызмет етсе, биылғы көктемде тіл үйренем деушілерге есігін айқара ашқан Тіл сарайының сырт­қы сымбаты көз қызықтырады. Мемле­кет­тік тілдің мәртебесі жайлы әрдайым жеткізе айтатын Мемлекет басшысы атал­ған нысанның тірлігімен танысуға уақыт тапты. Облыстық тілдерді дамыту басқар­ма­сының бастығы Тәңірберген Қасым­бер­кебаев Елбасына мұндағы жұмыс жай­лы қысқаша мағлұмат берді. Екі қабаттан тұратын құрылысы жыл ішінде аяқталып, биыл ақпанда іске қосылған ғимараттың жалпы аумағы 1800 шаршы метр. Бірінші қабатта қазақ тілін оқытатын үш, орыс және ағылшын тілдері кабинеттері орна­ласқан. Екінші қабатта облыстық тілдерді дамыту жөніндегі басқарма қызметкер­лері, “Мемлекеттік тілді оқыту орталы­ғы”, әдістемелік кабинеттер бар. Сондай-ақ 32 орынға лайықталған ілеспе аударма жүйесі (қазақ, орыс, ағылшын), тиісті құрылғылар орнатылып, “дөңгелек үстел” өткізуге арналған кең мәжіліс, 70 орын­дық шағын жиын залдары қажетті құрал­дармен жабдықталып, қандай шараны болсын жоғары деңгейде өткізуге мүм­кіндік жасалған. Ғимаратта бейнебақылау жүйесі, дер­бес АТС орнатылған. Елбасы осындағы тіл үйренушілермен пікірлесіп, соңғы үлгіде жабдықталған оқу ғимаратындағы мемлекеттік және басқа да тілдерді оқы­ту­дың маңыздылығын көрді. Тіл үйрену­ші­лердің кейбірі Елбасына Қазақстанда туып өссе де, әлі де қазақ тілінде жақсы сөй­лей ал­майтындықтарына ұятты екен­дігін жасыр­май, осы олқылықтың орнын толтыруға бет бұрғандарын айтты. Ал дені қазақ тілінде еркін сөйлей алатынын көрсетті. Мемлекет басшысы жер жаннаты Жетісудағы жұмыс сапарын екі жыл бұ­рын пайдалануға берілген Достық үйінде жалғастырды. Елбасын аулада облыстағы 23 этномәдени орталық өкілдері айшықты ұлттық киім мен сазды ән-биімен ду­ман­датып, емен-жарқын пейілде қарсы алса, қаладағы “Әжелер” ансамблі айтқан “Үш­қоңыр” әніне Елбасы да қосылды. Қай ұлт өкілі болмасын Жетісуды мекен еткен ұлттардың мәдениеті мен тілінің, өнерінің дамуына жасалған жағдайға ризашылығын айтып, өздерінің Қазақстандай елдің тұр­ғыны болғанын Алланың сыйы ретінде қа­былдайтындықтарын мақтанышпен жайып салды. “Ұлағат” ақсақалдар кеңе­сінің, “Бірлік” жастар бірлестігінің мүше­лері ел болашағы, жастар тәрбиесі, ұлттық салт-дәстүрлердің бүгінгі жайын баяндап берді. Татар этномәдени орталығында болған Президент хореография, акт зал­дарын ара­лады. Өңірдегі этномәдени ор­талық көр­кемөнерпаздарының концертін тамашала­ды. Тілі басқа, тілегі бір, жүзі басқа, жүрегі бір көп ұлттарды біріктірген киелі ша­ңыраққа қош келдіңіз, деді олар тебірене. Өркениетті қоғам құрудағы баянды бастама – тілдердің үшбағыттылығы нәти­жесінде өмірге келген Тіл сарайында бүгінде үш тіл жан-жақты оқытылуда. Оған қоса, әсем конференц залда шетел қонақтарын ұялмай қарсы алатындай жағдай жасалған. Мұнда бір отбасының баласындай көп ұлт өкілдері тату-тәтті, салт-дәстүр, тілін, дінін сақтап, бас қоса­ды. Осының нақты дәлелі ретінде олар облыс жұртшылығы атынан Елбасына ел игілігі жолындағы ізгі істеріңіз оңға бас­сын, Алла тағаланың Сізге деген ықылас-ниетінен бойыңызға күш-қуат құйылсын деген ізгі пікірлерін жаудырып жатты. Достық үйінде орналасқан этномәде­ни орталықтар мен ұйымдар үшін барлық жағдай жасалса, бірінші қабатта мульти­медиялық орталық, лингафон кабинеті, дыбыс жазу студиясы мен әкімшілік ка­бинеттері келгендерге қызмет көрсетуде. Үлкен жиынжай, әдістемелік кабинет, хореография, шағын мәжіліс залдары, Қазақстан халқы кіші Ассамблеясы кабинеттері екінші қабатқа орналасыпты. Ғимарат құрылысына облыстық бюджеттен 496,3 млн. теңге бөлініп, оны салу барысында ұлттық-мәдени орталық жұмыстарының ерекшеліктері мен қа­жеттіліктері толық зерттеліп, ескерілгені де аңғарылады. Жалпы ортақ Отанымыз­дағы басты құндылық – достық, ын­ты­мақ болса, оған аталған нысанның атауы да, атқаратын ісі де нақты дәлел бола­тынына тағы бір мәрте көз жетті. Жалпы алаңы 4217 шаршы метрді құрайтын ны­санда мемлекеттік тілді, өзге ұлт тілдерін үйренуге арналған мультимедиялық және лингафон орталығы, дыбыс жазу сту­диясы, би және акт залдары, Ассамблея сессияларын өткізуге арналған үлкен жиын залы осындағылардың мәдени-тұр­мыстық талғамына жауап беріп, қай­тарым­мен жұмыс жасауына жол ашып отыр­ғанын айтқанның артықтығы жоқ. Демек, мемлекеттік тіл мәртебесі, бола­ша­ғы жайлы мың айтқаннан осындай нақ­ты іс атқарғанның әлдеқайда пайдасы зор екеніне баршаның көзі жетті деуге болады. Күмісжан БАЙЖАН. ---------------------------------- Суретті түсіргендер С.БОНДАРЕНКО, Б.ОТАРБАЕВ.