Палата алдындағы міндеттер ауқымды

Кеше Парламент Мәжілісінің Төрағасы Орал Мұхамеджановтың жетекшілігімен палатаның күзгі алғашқы жалпы отырысы өткізілді. Онда спикер Президенттің Парламент сессиясының ашылуында сөйлеген сөзіндегі басымдықтарға және одан туындайтын міндеттерге кеңінен тоқталды. Мәжіліс Төрағасы ЕҚЫҰ Саммитінің өткізілуі туралы шешім еліміздің әлеуметтік-экономикалық және қоғамдық-саяси дамуда қол жеткізген жарқын табыстарын объективті түрде тану болып қана қоймай, жаһандық қауіпсіздік пен ынтымақтастыққа лайықты үлес қоса алатын беделді мемлекетке айналғанын да айғақтай түсерін ерекше атай кетті. Сондай-ақ спикер ел ішіндегі оң үдерістерге де тоқталды. Атап айтқанда, өн­дірістің әр түрлі салаларындағы жағдай айтарлықтай жақсарып, қаржы жүйесі тұрақтанған. Мем­лекет жоспарда тұрған барлық әлеуметтік міндеттемелерді толық көлемде орындап келеді. Үдемелі индус­трия­лық-инновациялық даму бағ­дарламасын іске асыру шеңберінде 72 жаңа өндіріс орны ашылса, жылдың соңына дейін тағы да сонша өндіріс іске қосы­лады деп күтілуде. Оның үстіне Үкімет жыл соңына дейін Ин­дус­триялық сая­сат, Арнайы эко­но­ми­калық ай­мақ­тар және Инвес­тициялар туралы заңдарға өзге­рістер мен толықтыру­лар енгізуге қатысты және өзге де заң жоба­ларын ұсынуы тиіс. Әсіресе, осы сессияда “Ғылым туралы” Заң­ның жаңа редакция­сымен жұмыс аяқталуы қажет. Сонымен қатар, мемлекеттің құқық қорғау саласы мен сот жүйесін одан әрі жетілдіруді заң­на­малық жағынан қамтамасыз ету бойынша ауқымды жұмыс күтіп тұрғаны ерекше аталды. “Қыл­мыс­керліктің профилактикасы, қылмыстық жазасын өтеген адамдарды әлеуметтік бейімдеу және оңалту жүйесін реформалау тұрғысынан да үлкен заңнамалық мәселелер топтамасын шешуіміз керек”, деді Орал Байғонысұлы. Еліміздің зияткерлік меншікті қорғау туралы заңнамасын халық­аралық стандарттарға сәйкес кел­тіру, нотариат туралы заңнаманы жаңарту уақыт талабы. Спикер депутаттардың бюджет жобасына қойылатын талаптары заң жобасы енгізілгенге дейін айқындалуы қажеттігін айта отырып, осы ретте Президенттің мемлекеттік шығыс­тарды азайту және шұғыл қажеттіліктер үшін қаржы резерв­терін қалыптастыру туралы тап­сырмасын ескеруді назарға салды. Палатада “Мемлекеттік мүлік туралы”, “Неке (ерлі-зайып­ты­лық) және отбасы туралы”, “Атом энер­гиясын пайдалану туралы”, “Мүд­делік қолдау ту­ра­лы”, “Халықтың көші-қоны ту­ра­лы”, “Мұнай өнім­­дерінің же­келеген түрлерін өндіруді және олардың айна­лымын мем­лекеттік реттеу ту­ралы”, “Қа­зақстан Рес­публи­касының кейбір заңна­ма­лық акті­леріне азаматтарды тұр­ғы­лықты жері бойынша тіркеу мәселелері бойынша өзгерістер мен то­лық­тырулар енгізу туралы” заң жо­баларымен жұмыс аяқталу ал­дын­да. Осы ретте Мәжіліс Төр­аға­сы Үкімет тарапынан ұсыны­латын заң жобаларының сапасына айрықша мән берілуі қажеттігін нығарлай жеткізді. “Өкінішке қа­рай, Мәжілістің қарауына жетіл­меген, қалай болса солай құрас­ты­рыла салған жобалардың түсуі жиі орын алып тұрады. Сонымен бірге, біз Президенттің тапсырма­сы бойынша мемлекетіміздің стра­тегиялық даму бағдарламаларына бөлінетін қаражаттың ұтымды жұмсалуын қатаң бақылауға алуды қамтамасыз етуге тиіспіз”, деді О.Мұхамеджанов. Олай болса, “Нұр Отан” ХДП Төрағасы Нұр­сұл­тан Назарбаевтың алға қойған барлық міндеттерін іске асыруда партия мен оның Мәжілістегі фракциясына маңызды міндеттер жүктелетіні анық. Партияның бағдарламалық құжаттары тәртіп болғанда ғана табысты түрде орындалады. Бұдан кейін депутаттар Мәжі­ліс Төрағасының орынбасары болып сайланған Экономикалық реформа және өңірлік даму комитетінің төрағасы Владимир Бобровтың орнына Сейітсұлтан Әйімбетовті лайықты деп тапты. Сайлау ашық дауыс беру арқылы жүзеге асты. Кешегі отырыста күн тәртібіне қойылған мәселелердің барлығы дерлік заң жобаларына қоры­тынды әзірлеумен шектелді. Есе­сіне депутаттар түрлі мемлекеттік органдарға көптеген сауалдар жолдады. Асқар ТҰРАПБАЙҰЛЫ.