04 Қыркүйек, 2010

Тұрақты даму түпқазығы

450 рет
көрсетілді
2 мин
оқу үшін
“Нұр Отан” ХДП Орталық ап­паратында “Қазақстан Респуб­лика­сының Конституциясы – мем­лекет пен қоғамның тұрақты дамуының негізі” деген атпен ғылы­ми-тәжірибелік конференция өтті. Аталған шараның ұйымдас­ты­рушысы – “Нұр Отан” ХДП Парламентаризм институты. Кон­ференция жұмысына Парламент депутаттары, еліміздің Конститу­циялық Кеңесінің, Жоғарғы Со­тының, Орталық сайлау комис­сия­сының мүшелері,  Президент Әкімшілігінің, Үкіметтің, Бас про­куратураның, Қазақстан халқы Ассамблеясының, сондай-ақ, түрлі халықаралық және үкіметтік емес ұйымдардың өкілдері, ғалымдар мен сарапшылар қа­тысты. Конференция кезінде оған қатысушылар Ата Заңның 15 жыл­дық кезеңдегі дамуын, оның демо­кратиялық институттар мен эко­но­микалық және әлеуметтік ре­фор­малардың негізін қалаудағы орнын жан-жақты саралап, өз ой-пайымдарын ортаға салды. Мәсе­лен, партия хатшысы Ерлан Қа­рин өзінің сөзінде егемен ел Конс­титуциясының тарихы 15 жылдық кезеңді көрсеткенімен, оның та­мыры тым әріде жатқанын, соның ішінде Алаш партиясы жарғылары  мен қазіргі Конституцияның ұқсас тұстары бар екендігін атап өтті. Оның айтуынша, 15 жылдық бе­лесті бағындырған ел Консти­ту­циясының бірнеше сипатын атап өтуге болады. “Ол әлеуметтік си­пат. Яғни, әлеуметтік сипат біздің Ата Заңымыздың басты ерекше­лігін көрсетеді. Мәселен, Қазақ­стан Конституциясының әлеумет­тік құқықтарға қатысты көптеген қағидалары Еуропа елдерінің конс­титуцияларымен салыстыр­ғанда нақтырақ көрсетілген деуге болады”, – деді “Нұр Отан” ХДП хатшысы. Ал Парламент Сенаты­ның депутаты Анатолий Башмаков өз кезегінде Конституция, пре­зиденттік институт және парла­мен­таризмнің Қазақстан қоғамы­ның саяси үдерісінің негізгі қоз­ғаушысы екенін атап өтті. Конференцияда, сондай-ақ, Негізгі Заңның қабылданған күні­нен бастап дамуы, еліміздегі конс­титуциялық заңнамалардың бүгіні мен келешегі, қазақстандық қо­ғам­ның модернизациялауына сәй­кес, ондағы заңнамаларды заман талабына сай жетілдіру, демокра­тиялық үдерістерді дамыту, қазақ­стандық парламентаризм мен азаматтық қоғам институттарын құру, елдегі партиялық-саяси жүйе­лерді жетілдіру секілді бірқа­тар мәселелер де әңгіме өзегіне айналды. Конференция соңында оған қатысушылар Қазақстан қо­ғамы­ның одан әрі демократия­лануы мен үдемелі дамуын көз­дейтін бірқатар ұсынымдар қабылдады. Ләйла ЕДІЛҚЫЗЫ.