Тариф саясатында табандылық қажет

Кеше Парламент Мәжілісі Төрағасының орынбасары Жәнібек Кәрібжановтың жетекшілік етуімен Үкімет сағаты өтіп, онда “Тарифтік саясаттағы энергияны үнемдеу” деген тақырып төңірегінде ой қозғалды, деп хабарлады Мәжілістің баспасөз қызметі. Үкімет сағатында аталған тақы­рып бойынша Табиғи монополия­лар­ды реттеу агенттігінің төрағасы Нұрлан Алдабергенов баяндама жа­сады. Сонымен қатар, баяндамашы осы мәселе төңірегінде депутаттар­дың сұрақтарына жауап берді. Тарифтік саясаттағы энергияны үнемдеу, реттелетін секторлардың инвестициялық тартымдылығын көтеру, электр энергиясын және суды үнемдеу мәселелерін шешу жұмысы, сондай-ақ осыларға қатысты басым міндеттер туралы ақпарат жария етілді. Қазіргі кезде агенттік 1632, оның ішінде су кәрізі жүйелерінің са­ласында – 867, электр энерге­ти­ка­сы саласында – 469, мұнай мен газды тасымалдау саласында – 52, кө­лік саласында 244 реттелетін қыз­меттерді көрсететін 1080 табиғи монополия субъектісінің қызмет­терін реттеуді жүзеге асырады екен. Бұдан басқа, 400 доминант-субъект және 15 мемлекеттік монополия субъектісі бойынша баға белгілеу функцияларын жүзеге асырады. Н.Алдабергенов агенттік қыз­ме­тіне қатысты өзге де атқарылған жұмыстар мен алда тұрған мін­дет­тер туралы жан-жақты айтып өтті. Үкімет сағатын Парламент Мә­жілісі Төрағасының орынбасары Жәнібек Кәрібжанов қорытын­ды­лады. Ол қорытынды сөзінде: “Эко­номиканың монополиялық секторын мемлекеттік реттеу, энер­гияны үнемдеу, энергия ресурста­рын, электр энергиясын және суды үнемдеу мәселелерін шешу – агент­тік жұмысының басты стра­тегиялық бағыты. Ал осы бағытта­ғы жасалып жатқан іс-шаралардың басты мақсаты – тұрғындардың-тұтынушылардың мүдделерін қамтамасыз ететін тиімді тарифті қалыптастыру саясатын іске асыру. Тағы да бір айта кететін мәселе – осы саладағы көрсетілген заң нормаларының және тұтынушы­лар­дың құқықтарының бұзылуын болдырмауды бақылау және жауап­кершілікті қажет етсе, тағы да күшейту”, деді. Үкімет сағатының нәтижелері бойынша дайындалған ұсынымдар­ға толықтырулар енгізіліп, Үкіметке жолданатын болды.