“Жол картасы” жақсы істердің жолын тапты

Еңбек және халықты әлеуметтік қорғау министрі Гүлшара Әбдіқалықова жұмыс сапарымен облыста болып, “Жол картасы” бағдарламасы бойынша атқарылып жатқан  жұмыстардың барысымен танысты. Облыс орталығындағы  Жүсіпбек Ай­мауы­тов атындағы  қазақ музыкалы драма теа­тры осы бағдарлама бойынша күрделі жөндеуден өтіп, көрермендер залы, сахна, сах­налық құрал-жабдықтарын  жаңартты. Сонымен қатар төбесі жөнделіп, өрт сөн­діру және бейнебақылау жүйелері ауысты­рыл­ды. Бұл мақсатқа бағдарлама аясында 217 842 мың теңге бөлінді, оның 173 606 мың теңгесі республикалық қазынадан қа­рас­тырылса, қалғаны облыстық бюджет есе­бінен бөлінген. Енді бір аптадан кейін театр жаңа маусымның шымылдығын ашу­ға дайындалуда. Жаңа кейіпке енген театр­ды көрген министр “Жол картасы” арқы­лы жүргізілген жұмыстың нәтижесіне жақ­сы баға берді. Облыс әкімі Бақытжан Са­ғын­таев келесі жылы  А.Чехов атындағы орыс драма театрында осы  жұмыстың жалғасын табатынын жеткізді. Бұдан кейін министр “Жол картасы” бойынша облыс ор­талығында жүргізіліп жатқан басқа да жөн­деу жұмыстарымен танысты. Олардың қатарында орыс-славян мәдени орталы­ғы­ның ғимараты да бар. Бұл ғимарат 1957 жыл­дан бері күрделі жөндеу көрмеген екен.  Оған 89 388 мың теңге бөлінген. Ғи­ма­рат жаңа жыл алдында дайын болады. Келесі кезекте министр қаладағы “Тол­қын” денешынықтыру-сауықтыру кеше­нін­де  болды. Кешен  спорт сүйер жастар­ға, қала тұрғындарына жақсы сыйлық болды. Бұрынғы ескі бассейн бүгінде бір­ыңғай көгілдір түсті кафельмен қапталып­ты. Қабырғалары, төбесі  жаңартылып, жөн­деліпті. Айналасы арнайы жылытыла­тын еденмен жабдықталған. Су температу­ра­сы  әрдайым реттеліп отырады. Жаттық­ты­рушылар алдағы уақытта ел чемпио­натын өткізуге болатынын айтып қалды. Бұдан  кейін Гүлшара Әбдіқалықова соғыс және еңбек ардагерлеріне арналған об­лыс­тық “Ардагерлер үйі” санаторийіне келді. Жылына 1300 адам  емделіп, демалатын бұл жерде соғыс мүгедектеріне, қаты­су­шы­лар мен оларға теңестірілген азаматтарға қысқа мерзімді санаториялық-курорттық емдеу жүргізіледі. – Биыл  “Жол картасы” бағдарлама­сы­на республика бойынша 143 миллиард теңге бөлінді. Жалпы, бағдарлама аясында бөлінген қаржы толығымен игеріліп жа­тыр. Елімізде қазір 5 500 нысанда жөндеу жұмыстары аяқталып та қалды. Барлық мер­дігер компанияларға атқарған жұмыс­тың сапасына үш жылға дейін жауапты болу жүктеліп отыр. Павлодар облысына 6 млрд. теңгеге жуық қаржы бөлініп, 134 нысан қамтылды. Өзім келіп көріп куәсі болғанымдай, мәдени орындар, білім беру мекемелері, жолдар жаңаша кейіпке енуде. Коллекторларды жөндеу жұмыстары қолға алынғаны қуантады. Себебі , су мәселесі жылдар бойы күрмеулі болған еді, – деді министр Гүлшара Әбдіқалықова. Министрдің айтуынша, “Жол картасы” бағдарламасы бойынша екі жыл қатарынан бөлінген қаржы енді келесі жылы басқа бағдарламаларға бағытталады. Мысалы, биыл қолға алынған “Жол картасы-2020” бағдарламасы шеңберінде алда бірқатар жұмыстар күтіп тұр. Жаңа жұмыс орын­да­ры ашылып, жаңа нысандар қолданысқа берілмек. Сонымен бірге облыстарда жер­гілікті жеке бағдарламалар да басталады. Министр осы екі жылда “Жол картасы” бағ­дарламасы еліміз бойынша барлық жердегі жұмыстарға үлкен серпіліс бер­генін жеткізді. Облыс әкімі Бақытжан Сағынтаев атап өткендей, қабылданып жатқан салалық бағдарламалар енді “Жол картасының” жүгін арқаламақ. “Биыл Үкімет тұрғын үй-коммуналдық шаруашылығы мен энерге­ти­каны дамыту, ауыз су мәселесі бойынша жекелеген бағдарламалар қабылдады. Мұн­да осы бағыттар бойынша әрбір өңірдің қажеттілігіне қарай қаржы қарастырылған. Мысалы, бұрындары тұрғын үй-комму­нал­дық шаруашылығы мәселелері “Жол картасы” бойынша шешілсе, енді тікелей өзіндік бағдарлама арқылы қаржы бөлініп, жүзеге асатын болады, – деді облыс әкімі. Фарида БЫҚАЙ. Павлодар.