Кеше Қазақстан Республикасы Парламенті Мәжілісінің Төрағасы Орал Мұхамеджанов Германия Федеративтік Республикасы Бундестагының Төрағасы Норберт Ламмертпен кездесті, деп хабарлады Мәжілістің баспасөз қызметі.
Мәжіліс Төрағасы өз сөзін мәртебелі мейманды батыс және шығыс Германияның біріккеніне 20 жыл толуымен құттықтаудан бастады. Кездесуде тараптар екі елдің Мемлекет басшыларының ынтымақтастық байланысты дамытуға қосып отырған үлестерін атап өтті. Мәселен, Қазақстан Президенті Германияға 6 рет сапармен барғаны, өз кезегінде Германия басшылығы да Қазақстанда бірнеше рет болғаны, жоғары деңгейдегі кездесулерде маңызды келіссөздерге қол жеткізілгені айтылды.
Екі елдің ынтымағы арта түсуіне Қазақстанның Германиядағы жылы аясында атқарылған іс-шаралар оң әсерін тигізді. Сонымен қатар, үстіміздегі жылы Германияның Қазақстандағы жылы да табысты өтуде. Саяси-экономикалық, мәдени-әлеуметтік байланыстар қарқын алды.
Бундестаг Төрағасы Германия Қазақстанды Орталық Азиядағы сенімді әріптесі деп санайтынын мәлім етті. Кездесуден кейін Норберт Ламмерт Мәжілістің құрметті қонақтар кітабына тілегін жазып, қолтаңбасын қалдырды.
* * *
Сондай-ақ “Алатау” спорт кешенінде Германияның Қазақстандағы елшілігінің ұйымдастыруымен Астана оқушыларының арасында шағын футболдан турнир басталды. Германия Бундестагының (Парламентінің) Төрағасы Норберт Ламмерт пен Қазақстан Парламенті Мәжілісінің Төрағасы Орал Мұхамеджанов осы шараның ашылуына қатысып, құттықтау сөз сөйледі.