Опера театрының басты оқиғасы

Абай атындағы Қазақ мемлекеттік академиялық опера және балет театрында “Қызыл Жизель” балетінің тұсауы кесілді Отандық опера және балет өнері­нің ордасы бұл күнге, дәл осы қойы­лымға ұзақ дайындықпен кел­генін атап өту керек. П.Чайковский, А.Шнитке мен Ж.Бизенің музыка­ларына жазылған Борис Эйфман­ның “Қызыл Жизель” сияқты бале­тін қою­ға кез келген театр труппасы тәуе­кел ете бермеген. Балет солис­терінің асқан шеберлігін қажет ететі­нін қойы­лымды қазақ сахна­сына шығаруға қазіргі заманның көрнекті балет­мейстері, Ресей халық әртісі, Мемлекеттік сый­лық­тың лауреаты Борис Эйфман­ның өзі келісімін беріпті. Сөйтіп ол бұл туындысын өз деңгейінде сахналау үшін сонау Санкт-Петербургтен Қа­зақ­станға ат сабылтып келіп жүр­геніне көп болды. Сондықтан да опе­ра театрындағы сөз етіп отырған қойылымды мау­сымның басты жаңалығы деп бағалаған дұрыс. Ең бастысы Абай атын­дағы опера және балет театрында “Қызыл Жизель­дің” басты партияларын тамаша орын­дай алатын балет бишілері табы­ла білді. Сөйтіп, бас­ты партияларды балет труппасы­ның белгілі солистері – Қазақстан­ның еңбек сіңірген қайраткерлері Құралай Сарқытбаева, Сәуле Рахме­дов­а, Дмитрий Сушков, халықаралық байқаулардың лауреат­тары Фархад Буриев пен Әмір Жексембек орын­дады. Алматыда екі күн қатарынан жү­ре­тін премьера ХХ ғасырдың әйгілі балеринасы Ольга Спесив­цева­ның қиын да күрделі тағдырына ар­нал­ған. “Мен оның өмірінің қал­тарыстарына үңіле келе мынаған көз жеткіздім, – дейді Борис Эйфман. ­– Керемет атақ-даңққа бөленген, табынушылары мен сыншыларының шексіз құрметіне ие болған ғажайып актриса 20 жылын Нью-Йорк ма­ңын­дағы жүйке ауру­ларына арнал­ған емханада жападан жалғыз өткіз­ген. Бұл қойылым Ольга Спесивцева өмірінің шығармашылық өмірін баяндау емес, мен оның жалқы тағ­дыры арқылы бір кездері Ресейден кетуге мәжбүр болған, өмірлері қай­ғылы аяқталған көптеген талант­тар­дың тұрлаулы тіршілігін көрсеткім келді”. Айнаш ЕСАЛИ, Алматы.