Шетелдіктер қызығушылық танытты

Ақтөбе қаласының әкімі Архимед Мұ­хамбетов оңтүстік кореялық POSСO кор­порациясының өкілдерін қабылдады. POSСO компаниясы болат өндіру жөніндегі әлемдегі ірі кәсіпорындардың бірі болып есептеледі, сонымен қатар рулондар, қалың және жұқа табақша түрінде көміртекті, тоттанбайтын және электротехникалық маркалардың бірнеше түрін шығарады.  Бүгінде POSСO корпора­циясының Кореяда және әлемнің басқа елдерінде барлығы 14 өндірістік активі бар. Архимед Мұ­хам­бетов компания өкілдерін қала экономика­сының даму қарқынымен таныстырды. Сонымен қатар ел Президенті Н.Назарбаевтың биылғы Ақтөбе облысына жасаған ресми сапары кезінде қаланың қол жеткен нәтижелерін жоғары бағалап, алға миллиондық қала мәртебесіне жету мақсатын қойғанын атап өтті. POSСO корпорациясы энер­гетикалық департаментінің өкілдері, менеджерлер Донг Ман Со және Джин Синг Юктің айтуы бойынша, корпорацияны болашағы зор инвес­тициялық жобалар қызықтырады. Кореялық қонақ­тар қаладағы жаңа жылу-электр орталығы және “ТрейдИнтерком” ЖШС трансформаторлар шығаратын зауытының құрылыстары туралы жобаларға үлкен маңыз беріп отыр. Кездесу барысында оларға өз капиталын салу үшін осы жобалар ұсынылды. Сатыбалды СӘУІРБАЙ, Ақтөбе облысы.