Тәртіп орнамай, істе береке болмайды

Кемшіліктерге жол бергендер мен қаржыны талан-таражға салғандар тиісті жазаларын алулары керек Кеше Астанада Әділет министрлігінің ғимаратында бейнеконференция режімінде “Әлеуметтік маңызды мемлекеттік бағдарламалардың іске асырылу барысына партиялық бақылау ұйымдастыру бойынша “Нұр Отан” ХДП филиалдарының қызметі туралы” мәселені қарастырған Партиялық бақылау комитетінің кезекті отырысы болып өтті. Аталған комитеттің міндеті – партия Төрағасы Н.Ә.Назарбаев­тың тапсырмасы бойынша жүзеге асырылып жатқан “Жол картасы – 2010”, “100 мектеп, 100 ауру­хана”, “Ауыз су”, “Үдемелі ин­дус­триялық-ин­новациялық даму”, “Батыс Еу­ропа – Батыс Қытай ха­лықаралық транзиттік дәлізі”, “Тұрғын үй құрылысын дамыту”, “Бірыңғай денсаулық сақтау жүйе­сі”, “Нұрлы көш”, “Балапан” және “Азияда – 2011” сияқты әлеуметтік маңызды мемлекеттік бағ­дарламалардың орындалуына бақылау жүргізу. Осы мақсатта 4139 партия бақылау бекеті құ­рылса, нысандардың қолданысқа берілуіне байланысты соның 2020-сы өз жұмыстарын тоқтатып отыр. Сондай-ақ өңірлерде халыққа қызмет көрсету орталықтарында, жол полициясы бөлімдерінде және жергілікті жол жөндеу учас­ке­лерінде жылжымалы партиялық бақылау бекеттері құрылған. “Нұр Отан” ХДП Партиялық бақылау ко­мите­тінің төрағасы Боран Ра­хымбеков бақылау бекеттерінің партиялық ба­қы­лаудың тиімді тетіктерінің бірі екен­дігін  ерекше атап өтті. Әйтсе де кемшіліктер де жоқ емес. Ол жө­нінде комитет төр­ағасының орын­ба­са­ры Оңал­бек Сәпиев мәлімдеп берді. Комитет төрағасы орынба­са­ры­ның келтірген мәліметтеріне қарағанда, мемсатып алу конкурс­тарын өткізу кезінде, нысандар құрылысын жүргізуге жағдай жасау мен еңбекақы төлеу және мердігер ұйымдардың өз міндет­те­ме­лерін орындау барысында бір­қатар кемшіліктер орын алған. Бақылау бекеттері басшыларының жыл басынан тендерлер мен өзге де процедураларға қатысуы туралы ұсыныс әлі де аяқсыз қалып келеді. Соның салдарынан кейбір ком­па­ниялар өңірлерде қажетті күші жетпесе де көптеген қосымша мер­дігерлерді жұмысқа тартуда. Мәселен, бар жоғы 292 ша­қы­рымға созылған “Жетіген – Қор­ғас” темір жол желісін салуда 3 мың бас мердігер және 40 қо­сымша мер­дігер тер төккен. Ал Жамбыл облы­сын­да 17 тендердің жеңімпазы бо­лып танылған “АрмСтрой” ЖШС жол салуда ол­қылыққа жол берген. Сол сияқ­ты Қызылорда облысында 14 лоттың жеңімпазы деп танылған “Реал плюс” ЖШС жұмысының са­пасыздығы анықталған. Қос­та­най облысында “Жаяу жүргінші жолын жөндеу” жобасы бойынша мем­ле­кет­тік сатып алуда 52 мил­лион тең­ге­нің дұрыс жұмсалма­ғаны белгілі болып отыр екен. Осы өңірде об­лыс­тық әкімдіктің құрылыс басқар­ма­сы тарапынан көпсалалы ауруха­на салуда орын­сыз жұмсалған қар­жы­ны жаба салғаны да айтылмай қалмады. Ол ол ма, тіпті пайдалануға берілген нысандардың жарамсыз қалып  жататындары да аз емес екен. Мәселен, “Ауыз су” бағ­дарламасы шеңберінде салынған Солтүстік Қазақстан облысының Смирново ауданы орталығындағы су айдағыш мұнара араға бірнеше ай салып құлап түсіпті. Шым­кент­те жаңадан салынған су құбыры желісі жарылса, мемлекет тара­пы­нан оған жұмсалған қаржы көлемі 700 миллион теңгені құрапты. Ақтөбе облысының Шалқар ауда­ны орталығында құрылыс салын­ған жер  сапасыз болып шыққан. Сонымен қатар, мемлекеттік са­тып алу, жоба-сметалық құжат­тар­ды дайындау барысында көптеген қателіктерге жол берілген. Сор­ақы­сы сол, мысалы, Павлодар об­лысында аймақтық кардиохир­ур­гиялық орталық 4 қабатты болуы тиіс болса, оның орнына 3 қа­батты ғимарат салынған. Мұндай кемшіліктер өзге де өңірлерде баршылық көрінеді. Партия мен Қаржы полициясы бірлесе жүргізген акция бары­сында көптеген кемшіліктер анық­талып, Ақмола облысында он қылмыстық іс қозғалса, Қостанай және Оңтүстік Қазақстан облыс­тарында – төрт, ал Маңғыстау об­лысында екі жергілікті атқару­шы орган басшысына қатысты екі қылмыстық іс қозғалыпты. Батыс Қазақстан облысында тағы бес лауазым иесіне қылмыстық іс қозғалған. Қызылорда облысында “Нәсіп Сервис-МП” ЖШС директоры құны 835 мың теңгелік медициналық құрал-жабдықтарды өтірік орындалды деп атқарылған жұмыс актісіне қосқаны үшін де үстінен қылмыстық іс қозғалғаны белгілі болып отыр. Отырыста бұдан басқа аймақтық партия филиалдарының қызметі тал­да­нып, жергілікті атқару ор­ган­да­ры­мен өз­ара іс-әрекет ету мәсе­ле­лері тал­қы­лан­ды. Өңірлер Жем­қор­­лық­қа қар­сы медиа орталығы журналистік зерт­теулерімен таны­су­ға мүмкіндік алды. Жұмыс нә­тижесіне байла­ныс­ты әзірленген ұсынымдар енді Үкі­мет­ке, облыс­тардың, Астана және Алматы қалаларының, аймақтық пар­тия филиалдарының басшы­ларына жолданатын болады. Асқар ТҰРАПБАЙҰЛЫ.