Табиғат тамыршыларының басқосуы

Бурабайда Қазақстандағы орман әлемін зерттеушілер мен табиғат жанашырларының “Қазақстандағы ерекше қорғалатын табиғи аймақ­тар­дың қазіргі жағдайы және оның даму болашағы” атты ғылыми-прак­тикалық конференция болып өтті. “Бурабай” мемлекеттік ұлттық таби­ғат паркі мен Қазақ орман шаруа­шы­лығы ғылыми-зерттеу институты ұйымдастырған шара табиғат пар­кінің 10 жылдығына, осындағы та­биғат мұражайының 50 және қа­зақтың тұңғыш ғалым-орманшысы, ҚР ҰҒА академигі Тайжан Тоқ­мұр­зиннің 80 жылдығына арналды. Конференцияны Ауыл шаруа­шы­лығы министрлігі Орман және аң­шылық шаруашылығы коми­те­тінің төрағасы Ерлан Нысанбаев құттықтау сөзбен ашты. Одан кейін “Бурабай” МҰТП директоры Әліби Ғазиз, ҚР ҰҒА академигі Сәбит Бай­зақов, АШҒА академигі, “Қаз­НИИЛХ” ЖШС директоры Болат Мұқанов, ҚР ҰҒА академигі, Ле­нин­дік сыйлықтың лауреаты Эрвин Госсен, “Көкше” академиясының ка­федра меңгерушісі, биология ғылымдары­ның докторы Әбілжан Құсайынов күн тәртібіндегі мәселе бойынша баяндама жасап, олар бойынша қызу талқылау ұйымдас­тырылды. Республикамыздың ерекше қор­ғалатын табиғи аймағы жүйесіне қосылатын “Бурабай” мемлекеттік ұлттық табиғат паркі табиғатты қорғау және ғылыми мекеме ретінде кең аумақты қызмет атқаруда. Қазір оның көлемі, қорғаныштық аймақ­тар­ды қосып есептегенде, 450 мың гектарға жетеді. Осынау он жыл ішінде ұлттық паркте көптеген жұмыстар атқарыл­ды. Әсіресе, Елбасының тапсырма­сы­мен Щучье-Бурабай курортты ай­мағын дамытудың 2007-2010 жыл­дарға арналған бағдарламасы қабыл­дануы қызмет өрісін кеңейте түсті. Туристік инфрақұрылым заманалық талаптар деңгейінде нығайтылып, Абылай хан экспозициялық кешені, ақпараттық және туристік қызметті үйлестіретін “Визит орталық” ашы­лып, алты гектарды алып жатқан өн­дірістік кәсіпорын құрылысы аяқ­талып келеді. Ұжым ғалымдары мен орманшылардың күшімен 282 гектар өрт шалған алқап қалпына келті­рілді. Өндірістік питомникте жыл сайын 5 миллион дана көшет пен 3 миллион дана себу материалы дай­ындалуда. Биыл “Астана-Бурабай” автобанының Бұланды аймағында ғана 4800 түп ағаш көшеті отыр­ғы­зылыпты. Конференцияда ерекше қор­­ғалатын аймақтағы өскіндер мен аңдарды қорғау ісін дамытуға бағыт­талған құнды пікірлер айтылып, “Бу­рабай” паркінің электронды басқару жүйесін таныстыру рәсімі өткізілді. Республикалық деңгейдегі ғы­лыми-практикалық конференцияға қатысушылар “Бурабай” МҰТП та­биғат мұражайын айрықша ықы­ласпен аралап көрді. Ол 1960 жылы Қазақ КСР орман шаруашылы­ғы­ның еңбек сіңірген қызметкері Ни­колай Черепановтың басшылығымен құрылған болатын. Жарты ғасырлық қажырлы еңбектің жемісі ретінде мұнда өсімдік әлемінің сирек түрлері жайқалып тұрғанын, “Қызыл кітап­қа” енген аңдар мен құстардың ме­кен­дейтінін айту қажет. Әсіресе, соң­ғы үш жылда 7 қонжықтың дү­ние­ге келуі ерекше оқиға. Мұра­жай­ды жыл сайын 70 мың адам тама­шалайды екен. Ғылыми және та­нымдық әлеуеті жоғары орталықтың материалдық-техникалық жабдық­талуы жақсартыла бермек. Қазақстан орманшыларының басқосуы ҚР Ұлттық ғылым акаде­мия­сының академигі, әйгілі ғалым Тай­жан Тоқмұрзиннің 80 жылды­ғына құрмет көрсетуге ұласуы да тол­ғанысты ойларға бастайды. ҚР ҰҒА академигі Сәбит Байзақов ме­рейтойлық баян­дама жасаса, про­фес­сорлар Серго Ыс­қақов пен Жұ­мабай Шоманов айтулы тұлғаның қызметі мен өмір жол­дарынан әңгі­ме өрбітті. Көкшелік ака­демиктің бастамасымен Қазақстанның орман шаруашылығын қалыптастыру және оны кешенді пайдаланудың мектебі қалыптасты. Тайжан Хамитұлы ор­ман әлемін зерттеу мен өнімділігін арттырудың биологиялық техноло­гиясын, ағашты пайдаланудың отыз­дан астам әдістемесін жасап шыққан бір­ден-бір ғалым. Оның басшы­лы­ғымен 13 ғылым докторы мен кан­ди­даты даярланды. Ғалым 90 моно­гра­фия­лық еңбектің авторы. Конференцияның ұйымдастыру комитетіне келіп түскен материалдар арнайы ғылыми жинақ болып жарық көретін болды. Бақберген АМАЛБЕК. Ақмола облысы, Бурабай ауданы.