Денсаулық зор байлық дейміз-ау...

Үш жүз мыңнан астам халқы бар Семейде қалалық денсаулық сақтау бөлімінің таратылғанына екі-үш жыл болып қалды. Ал оның қандай қажеттіліктен туындағанын ешкім дөп басып айта алмайды. Қалай болғанда да бұл шешімнен кейін мұнда бәрі жақсы болып кетті дегенге сену қиын. Ал облыстық денсаулық сақтау басқармасы бастығының орынбасары деңгейіндегі шағын штат барлық мәселеге бақылау жасай алмайтындығы және шындық. Соның айғағындай, биылғы жылдың алғашқы жартыжыл­ды­ғында жоғарыдағы тиісті орын­дарға Семейден сапасыз меди­циналық қызметке наразылық ретінде қырыққа жуық хат түскен көрінеді. Оларда қаладағы меди­цина саласындағы түрлі кемші­ліктер атап көрсетілген. Ал бы­лайғы жұртшылық аузынан естіліп қалып жататын өкпе-реніштер мұның сыртында. Әрине, қиын саланың өзіне тән қиыншылықтары қай кезде болмасын кезігіп жататыны рас. Солай дей тұрғанмен, өткен жыл­ғы аккредитация қорытынды­сымен қаладағы бірқатар емдеу орындарының қызмет көрсету құқығынан айырылып тынғаны көп нәрсені аңғартса керек. Айталық, биылғы жылдың алғашқы жарты­жылдығында емдеу мекемелерінде облыс бойынша мыңнан астам адам қайтыс болған. Өз сөзіне жауап бере алатын маман басшылардың мә­лімдеуінше, дұрыс ем қолданған жағдайда  соның ең кемі ал­пыстан астамын аман алып қа­луға мүмкіндік болыпты. Сондай мүмкіндіктің біршамасын се­мейлік дәрігерлер де пайдалана алмаған. Адам өмірінен асқан қымбат қазына жоқ десек, бір адамның өмірін сақтап қалудың өзі неге тұрады! Қазірде Семей қаласында да емдеу мекемелерін аккредитация­лау жүріп жатыр.  Қаладағы елуге жуық емдеу мекемелерінің тең жартысы бұл сынақтан өтіп үлгерді. Түпкілікті нәтиже жыл со­ңына қарай белгілі болады. Бар­лық талапқа сай емдеу мекеме­леріне алдағы үш жылға қызметін жалғастыруға кепілдік берілмек. Солайша сынақ әрі қарай жал­ғасуда. Осы орайда біздің негізгі әңгімеміз бұл емес екендігін қай­талап айтамыз. Семей қа­ласында тіпті ауыл шаруа­шылығы бөлімі жұмыс істеп тұрғанда денсаулық сақтау бөлімінің болмауы, ме­ніңше ақылға сыймайды. Рас, қалаға қарасты ауылдық округтер болған соң ауыл шаруашылығы бөлімі де керек-ақ шығар. Бірақ мұнда денсаулық сақтау бөлімі артықтық етеді деп кім айта алады? Әрі-беріден соң енді осында қалалық білім беру бө­лімінің болмауын көз алдыңызға елестетіп көріңізші! Ал бұған тиісті орындардың айтар уәжі қандай екен? Дәулет СЕЙСЕНҰЛЫ. Семей