Алдағы форумды асыға күтудеміз

ЕҚЫҰ төрағалығы ТМД елдерінен және мұсылман жұртының арасынан алғаш рет біздің елге сеніп тапсырылды. Мұның өзін  Елбасымыз Нұрсұлтан Назарбаевтың салиқалы, сарабдал  саясатының жемісі деп білеміз. Енді, міне, таяу күндерде көп­­теген беделді елдердің бас­шылары Астана Сам­ми­тіне жиналмақ. Бұл басқосудың қан­шалықты ма­ңы­зының бар екенін Түркістандағы халықаралық оқу орны­ның оқы­тушылары мен Түркі дүниесінің 28 ұлт пен ұлыстары­ның өкілдерінен тұ­ратын студенттері де жан- жү­ректерімен сезінуде және тағат­сыздана күтуде. Өйткені, осы шара арқылы әлемде оңды істерге қадам жасалады деп сенеді. Қазақстан осынау халықара­лық Ұйымға төрағалық ету ние­тін білдіре отырып, оған әзірлік барысында көпте­ген саяси ше­шімдерді қабылдады, өзінің әлеу­меттік-экономикалық және саяси дамуында көптеген белес­терден өтті. Бір кездері халық­аралық ұйымдардың бел­сенді қолдауына ие болған еліміз оны ма­ңызды істермен айшықтап, өзі де әлем­дік ауқымда өнеге көр­сететін жа­ғымды бастама­ла­ры­мен байыта түсті. Ең алдымен, ЕҚЫҰ ұсыныстарына сәйкес елде кең ауқымды саяси рефор­малар жү­зеге асырылды. Оның ішінде 2007 жылы жүргізілген конституциялық реформалар­дың маңызы үлкен. Соның нәтиже­сінде елімізде саяси партиялар туралы, сайлау туралы, бұқара­лық ақпарат құралдары ту­ра­лы заңнамаларға өзгерістер мен то­лықтырулар енгізілді, Пар­ла­мент­­тің және жергілікті мәсли­хат­­тар­дың рөлі анағұр­лым арт­ты­рылды, Қазақстан президент­тік респуб­ли­кадан президенттік-пар­ла­мент­тік республикаға айналды, халық пен билік арасындағы кө­пір тәрізді үкіметтік емес ұйым­дар­дың рөліне маңыз берілді. Енді, міне, Қазақстан өзінің аршын­ды  қадамымен 1999 жылы Анкарадан кейін Астана Сам­митін өткізуге бар ынтасымен кірісті. Онда, біріншіден, әлем­нің ең беделді де белді бас­шы­лары жиналады, бұл ел үшін, жұрт үшін сөзсіз абырой, мәр­тебе. Ал екіншіден, бұл шара Қазақстанға үлкен жауапкершілік жүк­тей­ді. Себебі, саммит сияқты халық­ара­лық шараны өткізуіміз, жоғарыда да айтқанымыздай, біздің еліміздің күллі ТМД елдері мен Орталық Азия мемле­кеттерінің арасындағы беделін айқындап беріп отыр. Еліміздің Еуропа төріне шы­ғуы мемлекетіміздегі толерантты­лық­тың жо­ғары деңгейге көтеріл­уі­нің арқасы, елдегі бірлік пен ын­тымақ орнағанының және дін­дер арасындағы келісімнің нәти­жесі. Жалпы алғанда, саммит ұйымдастыру арқылы Қазақстан өзінің қолынан көп іс келетінін дәлелдеп беріп отыр. Ж.АЙМЕНОВ, А.Ясауи атындағы ХҚТУ-дің  вице-президенті. Түркістан.