Бұрғылау ерітіндісі елімізде шығады

Соңғы кездері Маңғыстау ай­мағында Каспий теңізінің қазақ­стандық секторында теңіз таба­нындағы мұнайды игеруге аса қажетті жағалаулық инфрақұры­лымдарды салып, іске қосу жұ­мы­сында серпінділік пен өзара іскерлік байланыс жиі байқалу­да. Өйткені Солтүстік Каспий жобасына орай жүзеге асырыла­тын мұнай операцияларын сапа­лы инфрақұрылымдармен дер кезінде қамтамасыз етуде ондай жобалардың берері мол. Бұл ретте мұнайды өндіру және тасы­мал­даумен ғана шектелмей өң­деу өндірісін дамыту, сол бір мол қоры белгілі болған теңіз кен ор­нының байлығын халық игілігіне айналдыруда қазақ­стандық үлесті үстеме­лей түсуде назарда ұс­та­луы құп­тарлық жәйт. Осы мақсатта осы жыл ішінде ғана жаға­лау­лық инфра­құры­лымдар тығыз шоғырланып күн санап түлей түсудегі Түп­қара­ған ауданында бірнеше жоба жүзеге аса бастады. Соның бірі Елбасы Н.Назарбаевтың тікелей телекөпір ар­қылы қатысуымен құры­лысы танысты­ры­лымнан өт­кен Баутино­дағы бұрғылау ерітінділерін дайындау зауыты. Атал­мыш зауыт құрылысы 2009 жылдың үшінші тоқсанында бас­та­лып, жоспарланған мерзімнен бұрын аяқталды. Мұнай өнер­кәсібі үшін аса қажетті өнім шы­ғаратын ны­санды салуға тапсы­рыс беруші «Эм-Ай Дриллинг Флюз Интер­нэшнл Б.В.» Қазақ­стан-Америка бірлескен кәсіп­орны. Әзірге республика бойын­­ша бірден-бір осынау ерекше зауыт жобасының құны 2 млрд. 150 млн. доллар. Тапсырыс беруші америкалық компания Қазақ­станда жұ­мыс жасағалы 18 жыл болыпты. Сон­дықтан осы жерден шығарылатын өнім сапасы да өндіріс қуаты халықаралық деңгейде болады  дейді  сала ма­мандары. Қазақстандық үлес демекші зауыт құрылысына қажетті материалды түгелге дерлік дайын­дап, құрылыс монтаж жұмыста­рын жүргізген белгілі құрылыс­шы В.Перминов бас­қаратын ақ­тау­лық «АКМО-88» жауапкершілігі шектеулі серіктестігі. Отызға тарта адам еңбек ететін зауыттың жылдық өнімі 84 мың тонна са­палы бұрғылау ерітінділері бол­мақ­шы. Зауыт басшысы Эдгард Фернандес мырзаның айтуынша сұранысқа орай зауыттың үшінші кезеңін қосып өнімді көбейте түсуге де мүмкіндік бар көрінеді. Сөйтіп осы жылы ғана түлей түс­кен Түпқараған ауданында ғана кеме жөндеу цехы, теңіз опера­ция­ларын қолдау базасы, металл құ­рылғыларын жасау алаңынан соң өмір­ге елімізде алғаш рет бұрғылау ерітінділерін шыға­ра­тын зауыт жобасы жүзеге асты. ­ Жоламан  БОШАЛАҚ. Маңғыстау облысы, Түпқараған ауданы.