Үздік кәсіпкердің үлесі де үлкен

Жыл сайын облыс шағын бизнес субъектілерінің қатарын көбейте түсіп, аймақтың  іргелі компаниялары мен кәсіпкерлер арасындағы кооперативтік байланысты нығайтуға игі ықпал етіп келе жатқан «Табыс-2010» көрме-жәрмеңкесі биыл да сол үрдістен шыға білді. Өнеркәсібі өркенді, көлік секторы да, құрылыс жұмыстары да кең құлаш жая түскен қазыналы түбек еліміздің эконо­микасын өрге бастыруда айырықша рөл атқарып келеді. Осы ретте бүгіндері орта және шағын бизнес саласындағы кәсіп­кер­лер өткен жылдың осы кезеңімен са­лыстырғанда өнім шығаруды 92,3 пайыз­ға арттырса, шаруашылық жүргі­зуші субъектілердің  қатары 16,3 пайызға кө­бейіпті. Соның нәтижесінде шағын және орта бизнес саласында еңбек ететіндер саны өткен жылғы 32,6 пайыздан, осы жыл аяғына таман 40,1 пайызға өскен. Салық төлемінің мөлшері де екі есе өсіп, 21,9 млрд. теңгеге жетіпті. Осындай жетістіктер мен қол жеткен қомақты табыс­тар облыс кәсіпкерлерінің «Табыс-2010» көрме-жәрмеңкесінде кеңінен баяндал­ды. Бұл жолғы бір ерекшелік өткен көрмедегілерден түрлі тағамдар, азық-түлік, жеміс-жидектер, қазы-қарта, жал-жаялармен қатар іскер халқымыздың қолынан шыққан ұлттық киім-кешек, зергерлік бұйымдардың сан-алуан сәнді түрлері ерекше назар аудартты. Көрме-жәрмеңкені тамашалап, зер салған облыс басшысы Қ.Көшербаев, облысымызда шағын және орта бизнесті дамыта түсуге жасалудағы қамқорлық пен қолдау жай­лы айта келіп оларға әлемдік рынок­та бәсекеге қабілетті тауарлар мен өнімдер шығару, осынау іскерлікті кен қойнау­ларын игерумен айналысатындарға сапа_лы сервистік қызмет түрлерінің де кө­бейтілуі қажеттігіне тоқталды. Одан соң ол облысымыздың үздік кәсіпкерлеріне арнаулы дипломдар мен естелік белгілер тапсырды. Сөйтіп «Жылдың үздік кәсіпкері» номинациясы бойынша «Өзенқұрылыс» ЖШС директоры Ж.Сыдықов, «Каспий Агро Компани» серіктестігінің директо­ры Т.Наурызбаев «Ауыл шаруашылығы саласындағы үздік кәсіпкер», жеке кәсіпкер В.Алиев «Арзан және дәмді» тағамдар, «Оңдасынстрой» серіктестігі­нің директоры Б.Боранбаев «Құрылыс саласының үздік кәсіпкері», «Нейрон» ЖШС директоры  Б.Чагай «Халыққа қыз­мет көрсету», жеке кәсіпкер Ө.Өмі­ров «Халықтық қолөнер саласындағы үздік кәсіпкер», «Түпқараған шағын несие беру ұйымы» ЖШС директоры А.Беймағанбетова «Үздік шағын несиелік ұйым», «Волна» Ақтау кондитер фабри­касының директоры Н.Карась «Үздік әйел кәсіпкер», «Гурман» ЖШС дирек­торы В.Тетеря «Өнеркәсіп саласындағы үздік кәсіпкер», «ҚР кәсіпкерлерінің тәуел­сіз қауымдастығы» Маңғыстау облыс­тық филиалының төрағасы М.Хайрушев «Үздік қоғамдық кәсіпкерлер бірлестігі» үздік деп танылып, сый-құрмет пен марапатқа ие болды. Жоламан БОШАЛАҚ. Ақтау.